பார்ப்பன எதிர்ப்பு என்ற பெயரில் கம்யூனிஸ்டு ஆள்சேர்ப்பு திட்டம் பற்றி..

சிவனடியார் ஆறுமுகசாமி - சிதம்பரம் - தமிழ் வழிபாடு போன்றவற்றில் என் கருத்துக்கள் பெரியார்தாசனின் கருத்துக்களை ஓட்டியவை (நான் நாத்திகன். ஆனால், அதனை முன்னிருத்தாதவன்) . ஆனால், இந்த பதிவு பார்ப்பனியத்தை பற்றியோ அல்லது அதன் தீ விளைவுகளை பற்றியோ, அதற்கெதிரான போராட்டத்தை பற்றியோ அல்ல. அதனை நான் செய்யக்கூடியதை விட மிக சிறப்பாகவே பல பதிவர்கள் செய்துவருகின்றனர்.


ஆனால், இது சம்பந்தமாக மகஇக என்ற கம்யூனிஸ்டு இயக்கம் இதனை உபயோகித்து ஆள் சேர்க்க இறங்கியபோது, இதன் அபாயத்தை உணர்த்தும் விதமாக பதிவுகள் எழுதினேன். கம்யூனிஸ எதிர்ப்பை வழக்கம்போல, பார்ப்பன ஆதரவு, திராவிட எதிர்ப்பு என்று திரிக்கும் வேலைகள் நடந்துகொண்டிருப்பது எனக்கு அதிர்ச்சி இல்லை. இதனை எதிர்பார்த்தேன்.

சமீபகாலமாக ஒரு டிரண்ட் நட்ந்துவந்துகொண்டிருக்கிறது. அது திராவிட/பார்ப்பன எதிர்ப்பு பதிவர்களை குறி வைத்து அவர்களை கம்யூனிஸ்டு கட்சிக்குள் உள்ளிழுக்கும் விதமாக கம்யூனிஸ்டுகள் (ஒரே ஆளா, அல்லது கும்பலா என்று தெரியாது) பல பதிவுகளை துவங்கி ஒரே கட்டுரையை பல்வேறு இடங்களில் பதிந்தும் ஒரு திட்டமிட்ட அணுகுமுறையை வெளிப்படுத்தியிருந்தனர்.

இதன் விளைவுகள் நீண்டவை.

கடந்த நூற்றாண்டில் ஒரு பெரிய வீழ்ச்சியை கம்யூனிஸ்டுகள் தமிழ்நாட்டில் சந்தித்தார்கள். அது பற்றி "கலைஞருக்கு பாரத ரத்னா" என்ற பதிவில் சுட்டியிருந்தேன்.

திராவிட முன்னேற்ற கழகமும், பெரியாரிய சிந்தனைகளும், அன்றைக்கு பிரபலமாக இருந்த கம்யூனிஸ்டு சிந்தனைகளுக்கும், காங்கிரஸ் சிந்தனைகளுக்கும் மாற்றாக வந்து, தாழ்த்தப்பட்ட, பிற்படுத்தப்பட்ட இனத்தினரின் எழுச்சியாக வந்தது. அன்று காங்கிரஸ் கம்யூனிஸ்டு என்ற இரண்டு கட்சிகளுமே பார்ப்பனர்கள் தலைமையில் இருந்தன என்பது ஒரு உபரி செய்தி.

கம்யூனிஸ்டு கட்சியின் பக்கம் வந்து கொண்டிருந்த இளைஞர்கள் திராவிட முன்னேற்றக்கழகத்துக்குச் சென்றார்கள். அதனால், பெருத்த வீழ்ச்சியை சந்தித்தது கம்யூனிஸ்டு இயக்கம். ஏராளமான நக்ஸல்பாரி இளைஞர்கள் திராவிட முன்னேற்றக்கழகம் சென்றார்கள். தலைவர்கள் கம்யூனிஸ்டு கட்சியில் மீதமிருந்தாலும், மக்கள் ஆதரவு திமுகவுக்கே சென்றது. இதன் விளைவு, தமிழ்நாட்டில் தொழில்புரட்சி ஏற்பட்டது, நிறுவனங்கள் உருவாகின. இந்தியாவில் முன்னேறிய மாநிலங்களில் ஒன்றாக தமிழ்நாடு ஆனது. மேற்குவங்கம், கேரளா போன்ற சிபிஎம் மாநிலங்கள் அடைந்த பின்னடைவையோ, நக்ஸல்பாரி தீவிரவாதம் இருக்கும் ஜார்க்கண்ட், சட்டிஸ்கார்க், தெலுங்கானா போன்ற பகுதி மக்கள் அடைந்த பின்னடைவையோ தமிழக மக்கள் சந்திக்காமல் வெற்றிநடை போட்டார்கள்.

நக்ஸ்லைட்டுகளால் எந்த தொழில் முன்னேற்றம் இல்லையோ அதே தொழில் முன்னேற்றத்தை தமிழ்நாடு போன்ற மாநிலங்கள் அடையும்போது அதனை கெடுக்கும் வேலையையும், அந்த தொழிற்துறையால் படித்து பட்டம் பெற்று வேலையில் இருக்கும் இளைஞர்களிடம் பிரச்சாரம் செய்து தன்னை வளர்ப்பதையும் கம்யூனிஸ்டு இயக்கங்கள் செய்து வருகின்றன.

-

திமுகவுக்கும் கம்யூனிஸ்டு கட்சிக்கும் உள்ள ஒற்றுமை வேற்றுமைகள் என்ன என்பதை எண்ணிப்பார்ப்போமானால், இதனை ஓரளவுக்கு புரிந்த்கொள்ளலாம்.


திமுக பார்ப்பனரல்லாதாரின் உரிமை இயக்கம். அது பார்ப்பனரல்லாதார்கள் ஒடுக்கப்பட்டு உரிமை இழந்து இழிவு செய்யப்பட்டுக்கொண்டிருந்த சமூக சூழ்நிலையில் அவர்களது உரிமைகளை மீட்டெடுக்கவும், பரந்த தளத்தில் எல்லோருக்குமான உரிமைகளை பற்றி பேசவும் தொடங்கிய ஜனநாயக இயக்கம். இது அறவழியிலும், சட்டரீதியான போராட்டங்களிலுமே தன் உரிமைகளை நிலைநாட்டி வந்துள்ளது.

சட்டரீதியான போராட்டம் என்றால், யாரோ எழுதிய சட்டத்துக்கு மட்டுமல்ல, ஜனநாயகத்தில் ஈடுபட்டு தாங்கள் விரும்பிய புதிய சட்டங்களையும் உருவாக்கியிருக்கிறது. ஏராளமான மாறுதல்களை தமிழ்நாட்டில், மக்கள் உரிமைகளை பெற்றுத்தந்துள்ளது.
இந்த வழி மெதுவான வழியாக இருந்தாலும் சரியான வழி. இதே ஜனநாயக அமைப்புக்குள்ளான தனது பணியில் தவறுகள் நடந்திருக்கின்றன. அது மக்களால் சுட்டிக்காட்டப்பட்டுள்ளது. மக்கள் தீர்ப்பே மகேசன் தீர்ப்பு என்று அறிஞர் அண்ணாவும் கலைஞரும் மக்கள் அளித்த தீர்ப்பை ஏற்றுக்கொண்டுள்ளார்கள்.


ஆனால், கம்யூனிஸ்டுகளின் நடைமுறையோ, நோக்கமோ, வழிமுறையோ இதுவல்ல.

முன்பு சீர்திருத்தமே கூடாது, நேராக புரட்சி பண்ணவேண்டும் என்று அழைப்பு விடுத்து பெரியாரின் சீர்திருத்த பாதையை புறக்கணித்தார்கள். புரட்சி வந்ததும் ஜாதிகள் எல்லாம் ம்றைந்துவிடும் என்று கதையளந்தார்கள்.

தற்போது, அந்த பருப்பு வேகவில்லை என்று கண்டவுடன், ஜாதிகளில் வர்க்கம் உறைந்துள்ளது என்று பேச ஆரம்பித்திருக்கிறார்கள். இப்போதும், பெரியாரின் வழியை மேற்கொள்ளாமல், பெரியாரின் வார்த்தைகளை மட்டும் எடுத்து, பெரியாரின் வழியில் செல்பவர்களிடம் பேசி தங்களுக்குள் இழுத்துக்கொள்ள அலைகிறார்கள்.
கம்யூனிஸ்டு இயக்கம் உரிமை இயக்கம் என்று பெயர் சொல்லி வந்தாலும், வார்த்தை ஜாலம் காட்டினாலும் அது உரிமை இயக்கம் அல்ல. அது எல்லோருடைய உரிமைகளையும் பறித்து ஒரு சிலரை பொலிட்பரோ ஆட்களாகவும் கட்சி ஆட்களாகவும் ஆக்கி அவர்களிடம் எல்லா அதிகாரத்தையும் குவிக்கும் ஒரு அமைப்பு என்பது தெளிவு.

கேரளாவிலும் மேற்குவங்காளத்திலும் கம்யூனிஸ்டுகள் ஆட்சிக்கு வந்த மர்மம் என்ன? அது மேல்ஜாதிக்காரர்கள் சிறுபான்மையினரை அடக்கி அவர்களது ஓட்டுக்களையும் வாங்கி ஆட்சி செய்ய கிடைத்த உபகரணம் கம்யூனிஸ்டு இயக்கம்.

மிக எளிதில், யாரெல்லாம் கேரளாவிலும் மேற்குவங்காளத்திலும் ஆட்சியில் இருந்தார்கள் இருக்கிறார்கள் என்பதைபார்த்தால் இதனை அறிந்துகொள்ளலாம். ஜாதி, மதம் கடந்த கம்யூனிஸ்டுகளுக்கு ஒரு கிறிஸ்துவரோ அல்லது முஸ்லீமோ ஆட்சி செய்ய ஆள் கிடைக்கவில்லையா? காங்கிரஸ் கிறிஸ்துவ முதலமைச்சர்களை கேரளாவில் பதவியில் அமர்த்தியது. காங்கிரஸ் பிகாரில் முஸ்லீம் முதலமைச்சர்களை பதவியில் அமர்த்தியது. மஹாராஷ்டிராவில் முஸ்லீம் முதலமைச்சர்களை அமர்த்தியது. அஸ்ஸாமில் ஒரு முஸ்லீம் ஆட்சியில் இருந்தார். 1977இலிருந்து ஆட்சியிலிருக்கும் கம்யூனிஸ்டு கட்சி எத்தனை முறை பிற்பட்டவரை, அல்லது மாற்று மதத்தினரை பதவியில் அமர்த்தியது? ஒரு ஈழவர் கேரளாவில் முதல்வராக ஆக எத்தனை உள்எதிர்ப்பு இருந்தது என்று கேரள அரசியலை தெரிந்தவர்களை கேளுங்கள்.

சிபிஎம் எல் என்ற மாவோயிஸ்டு தலைவர்களை எடுத்துக்கொள்ளுங்கள். எத்தனை பேர் பிற்பட்ட வகுப்பினர்? எத்தனைபேர் மாற்று மதத்தினர்? கேட்டால், எங்களுக்குள் ஜாதி மதம் வேறு பாடு இல்லை என்று பம்மாத்து பண்ணுவார்கள்.

அதுமட்டுமல்ல, கம்யூனிஸ சமுதாயத்தில் மத அடையாளம் உண்டா என்று கேளுங்கள். இல்லை, எல்லோருடைய தன் அடையாளங்களும் அழிக்கப்படும் என்று சொல்வார்கள். ராமன் இந்தியாவின் தேச நாயகன் (என்னவோ அது மாதிரி) என்று பாஜக சொன்னால், அதனை எதிர்க்கவேண்டும், ஆனால், கம்யூனிஸ்டு கட்சி எல்லோருடைய சுய அடையாளங்களையும் அழிப்பேன் என்று சொன்னால் ஆதரிக்கவேண்டுமா?

சுய அடையாளங்கள் அழிந்துவிடுமா? நிச்சயம் அழியாது. அழித்தாலும் மீண்டும் மீண்டும் உருவாக்கப்படும் அதுவே மனித குணம். அப்படியிருக்கும்போது, எல்லா அதிகாரங்களையும் "பாட்டாளிகளின்" பெயரில் தன் கையில் குவித்துக்கொண்டு வெறியாட்டம் ஆடப்போகிற கம்யூனிஸ்டுகளை யார் கட்டுப்பாட்டுக்குள் கொண்டுவருவது? மக்களிடம் ஓட்டுக்கள் இராது. ஏனெனில், ஓட்டுப்பொறுக்கி அரசியலை அவர்கள் நம்புவதில்லையாம். மக்கள் தனியே தொழிற்சங்கங்கள் வைக்கமுடியாது. ஏனெனில், தொழிலாளிகளின் பாட்டாளி வர்க்க சர்வாதிகாரம் நடக்கும்போது எதற்கு தனியே தொழில்சங்கம்? ஏமாந்தா.. மொளகாய்தான்.

இன்றைக்கு பிற்பட்டவர்களின் உரிமைப்போராட்டம் திமுகவாக உருவாக இந்த ஜனநாயக அமைப்பில் இடம் இருக்கிறது. வன்னியர்கள் தங்களுக்கு அநீதி இழைக்கப்படுகிறது என்று கருதும்போது அவர்கள் அரசியல் ரீதியில் ஒன்றிணைய இந்த ஜனநாயக அமைப்பில் இடம் இருக்கிறது. முஸ்லீம்கள் தங்கள் உரிமைக்காக ஒன்றிணைய இந்த அரசியல் அமைப்பில் இடம் இருக்கிறது. எதிர்காலத்தில் யார் எப்படி பாதிக்கப்படுவார்கள் என்று நாம் அறியமாட்டோம். ஒரு வினோதமான ஒரு பிரச்னையை சொல்லுகிறேன். ஸ்விட்ஜர்லாந்தில் கார் ஓட்டுபவர்கள் சங்கம் இருக்கிறது. கார் வைத்திருப்பவர்கள் மீது அதிகமான வரி விதிக்கிறார்கள் என்று அவர்கள் ஒன்றிணைந்து ஒரு அரசியல் கட்சி நடத்தி அவர்கள் ஸ்விர்சர்லாந்து பாராளுமன்றத்தில் இருக்கிறார்கள். நாளை தமிழ்நாட்டில் தெருக்களில் எல்லோரும் கார்கள்தான் ஓட்டவேண்டும், சைக்கிள் ஓட்டக்கூடாது என்று சட்டம் கொண்டுவந்தால், சைக்கிள் ஓட்டுபவர்கள் போராட்டம் நடத்தலாம். யார் கண்டது?

இந்த ஜனநாயக அமைப்பு, பிரச்னைகளை பேசவும், அவற்றை பகிரங்கப்படுத்தவும், அதற்காக போராடவும், அவ்வாறு மக்கள் ஒன்றிணைந்து அரசியலில் ஈடுபட்டு பாதகமான சட்டங்களை மாற்றவும் வழி அமைத்து தருகிறது.

இந்த அமைப்பை ஒழித்து அதன் மீது தங்கள் சர்வாதிகாரத்தை கட்டத்தான் கம்யூனிஸ்டுகள் அலைகிறார்கள். ஆகவே, பார்வைக்கு வெளியே உரிமைகளுக்காக கோஷம் போடுவதையும், சிறுபான்மையினர் உரிமைகளுக்காக போராடுவதாகவும், தொழிலாளர் நலத்துக்காக போராடுவதாகவும் கதை பண்ணும் கம்யூனிஸ்டுகள், அப்படி உரிமை கேட்டு போராட அனுமதிக்கும் சமூக அடிப்படையையே அழிப்பதையே தங்கள் குறிக்கோளாக கொண்டுள்ளார்கள்.
உரிமைகள் கேட்டு போராடுவதில் கால தாமதம் ஆவதை வைத்து, இந்த அரசியல் அமைப்பே இப்படிப்பட்ட அமைப்புதான் என்று மக்களை நம்பவைத்து, அப்படி உரிமைகள் கேட்டு போராடவே முடியாத ஒரு சர்வாதிகார அமைப்பை உருவாக்க முனைபவர்கள்.

அத்னால்தான் கம்யூனிஸ்டுகளின் போராட்டம் எதுவாக இருந்தாலும் நான் எதிர்க்கிறேன். அப்படிப்பட்ட கம்யூனிஸ்டுகளோடு தற்காலிகமாக உறவு கொண்டாலும், அப்படி உறவு கொள்ளும் எந்த கட்சியையும் எதிர்ப்பேன்.