நக்சல்பாரி 'அபாயம்": அரசை அச்சுறுத்துவது ஆயுதமா, அரசியலா? ம க இ க தலைமைக்கு மக்களில் ஒருவனின் பதில்

துப்பாக்கிகள் வெடிகுண்டுகளுடன் ஜூன் 25 ஆம் தேதியன்று கைதான "தோழர்கள்" பழனிவேல், வேல்முருகன், முத்தமிழ்செல்வன் ஆகியோரும் பிறகு ஜூலை 8 ஆம் தேதியன்று கார்த்திக் ஈஸ்வரன் ஆகியோரும் கைது செய்யப்பட்டனர்.
இதனை பற்றி புலம்பி புதிய ஜனநாயகம் பத்திரிக்கை ஆகஸ்டு 2007 ஆசிரியர் குழு எழுதிய தலையங்கம்:

//நக்சல்பாரி 'அபாயம்": அரசை அச்சுறுத்துவது ஆயுதமா, அரசியலா?//

இந்த கட்டுரைக்கு என் பதில்

//நக்சல்பாரி 'அபாயம்": அரசை அச்சுறுத்துவது ஆயுதமா, அரசியலா?//
கடந்த ஜூன் 25ம் தேதியன்று பெரியகுளம் முருகன்மலைப் பகுதியில் மாவோயிஸ்டுக் கட்சியைச் சேர்ந்த 3 தோழர்கள் கைது செய்யப்பட்டுள்ளனர். பழனிவேல், வேல்முருகன், முத்தமிழ்ச்செல்வன் என்ற இந்த 3 பேரிடமிருந்து துப்பாக்கிகள், கையெறி குண்டுகள் போன்ற ஆயுதங்களும் கைப்பற்றப்பட்டதாக போலீசு கூறுகிறது. மற்ற சிலர் தப்பிவிட்டதாகக் கூறி, சிலருடைய புகைப்படங்களை ஊடகங்களில் வெளியிட்டிருக்கிறது, போலீசு. ஜூலை 8ம் தேதியன்று இரவு சுந்தரமூர்த்தி, கார்த்திக், ஈஸ்வரன் ஆகியோர் திருப்பூரில் கைது செய்யப்பட்டு, போலீசு விசாரணைக்குப்பின் சிறை வைக்கப்பட்டிருக்கின்றனர்.

தப்பியவர்களைப் பிடிப்பதற்கு மதுரை மற்றும் பிற நகரங்களிலும் ""கியூ'' பிரிவு உளவுத்துறைப் போலீசு வீடுவீடாகச் சோதனை நடத்தியிருக்கிறது.

வீரப்பனின் பிணத்தைச் சுட்டுக் கைப்பற்றிய விஜயகுமார் தலைமையிலான அதிரடிப்படை மேற்குத் தொடர்ச்சி மலைப் பகுதிகள் எங்கும் தேடுதல் வேட்டை நடத்தி வருகிறது.

""தமிழகமெங்கும் 70 பேர் கொண்ட 70 ஆயுதக் குழுக்கள்!'', ""பெரியகுளத்தில் ஏ.கே47 துப்பாக்கிகள், ஆயுதப் புதையல்கள், லேப் டாப் கம்ப்யூட்டர்கள்'', ""ஆயுதப்படையில் சேருவதற்குத் தயாராக 600 மாணவர்கள்'' என்று விஜயகாந்த் சினிமாவை விஞ்சும் வகையில் திரைக்கதை எழுதுகின்றன, பத்திரிகைகள். "நக்சல் வேட்டை' என்று போலீசு அராஜகத்தைக் கொண்டாடுவது, விஜயகுமாரையும் உளவுத் துறை போலீசு அதிகாரிகளையும் ஏதோ உயிருக்குத் துணிந்த வீர சாகச நாயகர்களாகச் சித்தரிப்பது, கைது செய்யப்பட்ட தோழர்களை "அவன், இவன்' என்று ஏகவசனத்தில் எழுதுவது என நாலாந்தரமான போலீசு எடுபிடிகளாகவும் பரபரப்புக்காகப் பச்சைப் பொய்களைப் புனைந்து எழுதும் பேனாத்தரகர்களாகவுமே பத்திரிகைகள் செய்தி வெளியிட்டு வருகின்றன.
//

அடேங்கப்பா, உங்கள் பத்திரிக்கையில் மற்ற எல்லோரையும் மிக மரியாதையுடன் விளித்துவிட்டீர்கள்! உங்களை மரியாதையுடன் அவர்கள் குறிப்பிடவில்லை என்பதுதான் ரொம்ப குறை!

//
மாவோயிஸ்டுகள் தமிழகத்தைச் சூழ்ந்திருக்கும் மாபெரும் அபாயம் போல ஒரு சித்திரம் திட்டமிட்டே உருவாக்கப்படுகிறது.
//

இப்படியே மாவோயிஸ்டுகளை விட்டால், அது தமிழகத்தை சூழ்ந்திருக்கும் மாபெரும் அபாயமாக ஆகிவிடுவார்கள் என்பது சரியான கூற்று. ஏமாந்த இளைஞர் உங்களுடைய ‘கவர்ச்சிக் காட்சிகளை’ நம்பி உங்கள் பின்னே போய் துப்பாக்கி ஏந்தி எவராவது ஒரு கிராம வாசியைச் சுட்டுத் தள்ளிக் கிரிமினலாக மாறிப் பின் போலிசால் சுடப்பட்டு இறக்க நேரிடும் அவலத்தைத் தவிர்க்கவும்தான் உங்களால் ஏற்படக் கூடிய அபாயம் எல்லாம் உருப்பெருக்கிக் காட்டப் படுகிறது என்று ஒருமுறையாவது தோன்றியதோ உங்களுக்கு? அதெப்படித் தோன்றும். பிரச்சினையாக இருந்துதானே பழக்கம் உங்களுக்கு. விடையாக இருந்தே பழக்கமில்லையே. இந்த முறை விடை உங்களை இருந்த இடம் தெரியாமல் ஆக்குவதுதான் ஏனெனில் நீங்கள் மற்றவர்களை அதே வழியில்தான் அணுகுகிறீர்கள்.

// எனினும் இந்தத் "தேடுதல் வேட்டை'க்குத் தலைமை தாங்கும் விஜயகுமார், நாஞ்சில் குமரன் போன்ற போலீசு அதிகாரிகள் ""அச்சப்படும் அளவுக்கு தமிழகத்தில் மாவோயிஸ்டுகள் வளர்ந்துவிடவில்லை'' என்று கூறுகின்றனர். கியூ பிரிவு எஸ்.பி. அசோக்குமார் ""தமிழகத்தில் மாவோயிஸ்டுகளின் எண்ணிக்கை 25 முதல் 35 வரை இருக்கலாம் என்பது எங்கள் கணக்கு'' என்று பேட்டி கொடுக்கிறார். ""கைப்பற்றப்பட்டுள்ள ஆயுதங்கள் மிகச் சாதாரணமானவை'' என்றும் போலீசே கூறுகிறது.
பிறகு ஏன் இந்த ஆரவாரம்? பெரியகுளத்தில் வேட்டை, குற்றாலத்தில் வேட்டை, கொடைக்கானலில் வேட்டை, தருமபுரியில் வேட்டை என்று விஜயகுமாரின் காட்டு சீன் ஸ்டில்கள், சினிமா ஸ்டில்களைப் போல அன்றாடம் பத்திரிகைகளுக்கும் தொலைக்காட்சிகளுக்கும் வழங்கப்படுவது ஏன்? பெரியகுளத்தில் நிரந்தரமான அதிரடிப்படை முகாம் எதற்கு?
//

ஏனெனில் ஆயுதம் தாங்க முற்பட்டுவிட்ட ஒரு குழு இன்றைக்கு ஒரே ஒரு கைத்துப்பாக்கிதான் வைத்திருக்கிறது என்று தூங்கவா முடியும்? இளையதாக முள்மரம் கொல்லவேண்டும் இல்லையா? மேலும் ஒரு இடத்தில் உள்ள கும்பல் கையில் ஆயுதம் பெரிதாக இல்லை என்பதால் இதர காடுகளில் அவர்களே போன்றவர் இல்லை என்று எடுத்துக் கொள்ள முடியுமா? அல்லது மேலும் கனரக ஆயுதங்களள எங்காவது ஒளித்து வைத்து இருப்பீர்கள் என்று அவர்கள் யோசிக்கக் கூடாதா? நீங்கள் போலிஸ் அதிகாரியாக இருந்தால் எதிராளி தன் அலுவலக வாயிலில் கன ரக பீரங்கி, டாங்கி மேலும் அணு ஆயுதத்துடன் வந்து நின்ற பிறகுதான் செயலில் இறங்கலாமா வேண்டாமா என்று யோசிப்பீர்களோ? அல்லது உங்கள் ஆட்சியில் எதிர்புரட்சியில் இறங்குகிறது ஒரு ஆயுதக்குழு என்றதும், நீங்களும், கையை கட்டிக்கொண்டு கனரக பீரங்கி டாங்கியுடன் வரும்வரை "தோழர்கள்" என்று மரியாதையுடன் அழைத்து, சும்மா ஐந்து பேர்கள் கைத்துப்பாக்கியை வைத்திருக்கிறார்கள், இதற்கு போய் என்ன அலம்பல் என்று சும்மா இருப்பீர்களா?

//
இது போலீசின் வழக்கமான விளம்பர மோகம் அல்ல; மக்களை அச்சுறுத்திப் பணிய வைக்கும் அரச பயங்கரவாதம். "நக்சல்பாரி' என்ற சொல்லைக் கேட்டாலே மக்களுக்கு அதிரடிப் படையின் கொடூரமுகம் நினைவுக்கு வரவேண்டும் என்பதும், அவர்கள் அஞ்சி நடுங்கி ஒதுங்க வேண்டும் என்பதும்தான் இந்த நடவடிக்கையின் முதல் நோக்கம்.
இரண்டாவதாக, இது தீவிரவாத ஒழிப்பில் மன்னனை விஞ்சிய ராஜவிசுவாசியாகத் தன்னைச் சித்தரித்துக் கொள்ள கருணாநிதி மேற்கொள்ளும் முயற்சி. ""தமிழகத்தைத் தீவிரவாத அபாயத்திலிருந்து காப்பாற்றி அமைதியான வாழ்க்கையை அளிக்கும் வல்லமை எனக்கு மட்டும்தான் உண்டு. கருணாநிதி ஆட்சிக்கு வந்தால் தீவிரவாதம் தலைவிரித்தாடுவதுடன், சட்டம்ஒழுங்கு சீர்குலைந்துவிடும்'' என்பது ஜெயலலிதா நிரந்தரமாக முன்வைத்துவரும் பாசிச அரசியல். துக்ளக் முதல் இந்து வரையிலான பார்ப்பனப் பத்திரிகைகளால் வழிமொழியப்படும் பிரச்சாரமும் இதுதான்.
//

மக்களது ஓட்டுக்களை நம்பி இருக்கும் அரசியல் கட்சிகள் அனைத்தும் தீவிரவாத அபாயத்திலிருந்து தமிழக மக்களை காப்பற்றவே முனைகின்றன. இதில் ஆச்சரியம் என்ன இருக்க முடியும்? வெறும் ஆயுதங்களை நம்பி பத்து பேரை சுட்டு, ஆட்சியை கைப்பற்றிவிடலாம் என்று நினைப்பவர்களை நினைத்து, அவர்களது பிளவுண்ட மனநிலையை நினைத்து மக்களும் அரசும் அஞ்சுவதில் என்ன ஆச்சரியம் இருக்கமுடியும்? துக்ளக் இந்து ஆகிய பத்திரிக்கைகள் மட்டுமா தீவிரவாத எதிர்ப்பு நிலைப்பட்டை கொண்டிருக்கின்றன? எல்லா மையநீரோட்ட பத்திரிக்கைகளும் ஊடகங்களும் தீவிரவாத எதிர்ப்பு நிலைப்பாட்டைகொண்டிருக்கிறன. ஒரு மாற்றுக்கு, தீவிரவாத ஆதரவு நிலைப்பாட்டை கொண்டிருக்கும் பத்திரிக்கைகளை வரிசைப்படுத்துங்களேன். அவைகள் எவ்வளவு மக்களால் படிக்கப்படுகின்றன என்பதையும் காட்டுங்களேன்.

//
தற்போது ஜெயலலிதாவின் ஆசி பெற்ற விஜயகுமாரை "நக்சல் ஒழிப்பு நடவடிக்கையின்' தலைவராக நியமித்திருப்பதன் மூலம் "வசிட்டன் வாயால் பிரம்மரிஷிப் பட்டம்' வாங்கத் துடிக்கிறார், கருணாநிதி. மேலும் பன்னாட்டு நிறுவனங்களின் வேட்டைக் காடாக தமிழகத்தைப் பேணுவதற்கும், ஆளும் வர்க்கங்களின் மனம் கவர்ந்த அமைதிப் பூங்காவாக மாநிலத்தை "மார்க்கெட்டிங்' செய்வதற்கும் நக்சல் வேட்டை என்னும் இந்த ஊதிப்பெருக்கப்பட்ட நடவடிக்கை திமுக அரசுக்குத் தேவைப்படுகிறது.
//

மறுபடி யோசியுங்கள். நீங்கள் சொலவது போல இல்லை. தமிழகத்தில் நக்ஸல்பாரிகள் இருக்கிறார்கள் என்பது வெளிநாட்டு மூலதனம் தமிழகத்துக்கு வருவதற்கு கேடானது. நக்ஸல் பிரச்னை இருக்கிறது என்று சொன்னாலே வரக்கூடிய மூலதனமும் வராது. இருந்தும் நக்ஸல் பிரச்னையை வெளியே சொல்லி அதனை ஒடுக்கமுயற்சிக்கும் அரசை பாராட்டவே வேண்டும். அலங்காரக் கொண்டையில் ஈறும் பேனும் இருப்பது எப்படியும் தெரிந்து விடும். பிறகு மாநிலத்துக்கு வேண்டிய பெரும் தொழில் மயமாகுதல் எல்லாம் தடைப் படும், பிறகு இந்த இரண்டாம் தர கம்யூனிச அரசுகள், மேற்கு வங்கத்திலும், கேரளாவிலும் இருக்கின்றனவே அவற்றைப் போல உலக வங்கி, டாட்டா, மிட்டல் என்று பலரிடம் போய் கையேந்தி நிற்க வேண்டி வரும். இப்போது உலக முதலாளிய நிறுவன அமைப்பாளர்கள் தாமே தேடி வருகிறார்கள். நாளை கருணாநிதி அவர்கள் அலுவலக வாயிலில் போய்க் கையேந்தும் நிலை வருவதைத் தடுக்கத்தான் இப்படி ஊக்கமாக நடவடிக்கை எடுக்க முன்வருகிறார். இதிலென்ன பெரிய மர்மம்? இதில் என்ன தவறு காண முடிகிறது உங்களால்?

//
போலீசைப் பொறுத்தவரை தனது கேள்விக்கிடமற்ற அதிகாரத்தை வலுப்படுத்திக் கொள்வதற்கும், தனது கிரிமினல் நடவடிக்கைகளை மறைத்துக் கொள்வதற்கும் கிடைக்கின்ற ஒவ்வொரு வாய்ப்பையும் அது பயன்படுத்திக் கொள்கிறது. மிகவும் அபாயகரமான பணியில் இராப்பகலாக ஈடுபட்டிருப்பதைப் போன்ற தோற்றத்தை மக்களிடம் ஏற்படுத்துவதற்காகவே, காடுகளிலும் மலைகளிலும் ""அவுட்டோர் ஷூட்டிங்'' நடத்துகிறது. தான் நடத்திய, நடத்தப் போகிற எல்லா "போலி மோதல்' கொலைகளையும் மறைப்பதற்கான திரைச்சீலைகளாக இவற்றைப் பயன்படுத்துகிறது.
//

போலீஸ் கட்டற்ற அதிகாரம் கொண்டதல்ல. அது ஆளும் மக்கள் பிரதிநிதிகளின் சொல்லுக்கும் ஆணைக்கும் கட்டுப்பட்டது. போலீஸ் கட்டற்று மக்களை அச்சுறுத்தினால், ஓட்டுக்களை இழக்கப்போவது ஆளும் கட்சிதான். ஆகவே, சட்டம் ஒழுங்கு சீர்குலைந்தால், மக்கள் நிச்சயம் ஆளும் கட்சியை தூக்கி எறிவார்கள். இது பலமுறை தமிழ்நாட்டில் நடந்துள்ளது. ஆகவே மக்கள் பிரதிநிதிகள் மக்களுக்கு அஞ்சுகிறார்கள். மக்கள் தீவிரவாதத்தை ஒருபோதும் ஆதரிக்கமாட்டார்கள் என்பதால், தீவிரவாதத்தை ஒடுக்க மக்கள் பிரதிநிதிகள் முனைகிறார்கள்.

//
இத்தனை பயங்கரமாகச் சித்தரிக்கப்படும் பெரியகுளம் சம்பவத்தில் நடந்திருப்பது என்ன? 3 பேர் சில ஆயுதங்களுடன் கைது செய்யப்பட்டிருக்கிறார்கள். குண்டு வெடிப்பு, போலீசுடன் மோதல், உயிரிழப்பு என்று எதுவும் நிகழவில்லை. கைது செய்த போலீசாருக்கோ ஒரு சிராய்ப்புக் காயம் கூட ஏற்படவில்லை. போலீசின் சட்டம் ஒழுங்கு பார்வையின் படியேகூட இது மிகவும் சாதாரணமான குற்றம்தான்.
//

இல்லை. நிச்சயம் இல்லை. ஆயுதம் ஏந்தியவனை தண்டிப்பது வேறு. ஆயுதம் ஏந்துவதை தன் கொள்கையாக கொண்ட இயக்கத்தினை ஒடுக்குவது வேறு. இதில் போலிசாரை நோக்கிச் சுட்டு அதில் இருவர் உயிரிழக்கவில்லையே என்று உங்களுக்கு மிக வருத்தம் போலிருக்கிறது. நீங்கள் என்ன போன பிறவியில் ரத்தக் காட்டேரியாக இருந்தீர்களோ? அல்லது இப்போதுமே அப்படித்தானா? சாதாரண மனிதரைக் கேட்டால் ‘நல்ல வேளை யாரும் யாரையும் சுடவில்லை. அதற்கு முன் ஆயுதங்களைக் கைப்பற்றி விட்டார்கள்’ என்று போலிசாரைப் பாராட்டவே செய்வார்.

//
தினகரன் பத்திரிகை மீது பட்டப்பகலில் போலீசின் முன்னிலையில் நடத்தப்பட்ட தாக்குதலுடன் இதனை ஒப்பிட்டுப் பாருங்கள். 3 ஊழியர்கள் கொல்லப்பட்டிருந்தும், அந்த வன்முறை வெறியாட்டம் மறுக்க முடியாதவண்ணம் வீடியோவில் பதிவு செய்யப்பட்டிருந்தும், ""தாக்குதலுக்குக் கருத்துக் கணிப்புதான் காரணம்'' என்று கூறி, சட்டமன்றத்திலேயே அதனை நியாயப்படுத்தினார், கருணாநிதி.
அண்ணன் அழகிரிக்கு 2% தான் ஆதரவு என்று எழுதியதற்காக ஒரு பத்திரிகை அலுவலகத்தை ஊழியர்களுடன் சேர்த்துக் கொளுத்தலாமாம். அழகிரி ஆதரவாளர்களின் கோபத்துக்கான காரணத்தை நாம் புரிந்து கொள்ள வேண்டுமாம். ஆனால், ஒரு இலட்சம் விவசாயிகளைத் தற்கொலைக்கும், பல ஆயிரம் முஸ்லிம்களையும் தலித் மக்களையும் படுகொலைக்கும், கோடிக்கணக்கான மக்களைப் பட்டினிக்கும் தள்ளும் இந்த அரசமைப்புக்கு எதிராக ஆயுதமேந்துவது தீவிரவாதமாம்!
//

தினகரன் அலுவலகத்தில் நடந்தது அழகிரியின் வன்முறை. அது தனிநபர் வன்முறை. தனிநபரான அழகிரியை தண்டிப்பது என்பது வேறு. வன்முறையை தன் வழியாக கொண்டு பல இளைஞர்களை சேர்த்துக்கொண்டு வன்முறை மூலம் போலீஸ், பொதுமக்கள், என்று அச்சுறுத்தி அதிகாரத்தை கைப்பற்ற விரும்பும் இயக்கத்தை தடுப்பது என்பது வேறு.

இந்த அரசைத் தேர்ந்தெடுத்தது இந்த மக்கள்தானே? திரும்பத்திரும்ப இதே கட்சிகளைத் தேர்ந்தெடுப்பதை விடுத்து இடது சாரிக் கட்சிகளையோ, பொதுவுடைமைக் கட்சிகளையோ தேர்ந்தெடுக்கக் கூடாதென்று யார் கையைப் பிடித்துத் தடுத்தார்கள்? அவர்கள்தானே எம்.ஜி.ஆர், ஜெயலலிதா, அண்ணாதுரை, மு.கருணாநிதி, சோனியா, லல்லுப் பிரசாத் யாதவ் என்று அவரவர் ஜாதி விசுவாசத்துக்கு ஏற்ற மாதிரியோ, கொடுக்கும் வாக்குறுதிகளுக்கோ வாக்களிக்கிறார்கள்? அடுத்த முறை நல்ல கட்சியாகப் பார்த்து வாக்களிக்கச் சொல்லிப் பிரச்சாரம் செய்யுங்களேன்?

//
மூன்று இளைஞர்கள் கையில் துப்பாக்கி வைத்திருந்தார்கள் என்ற குற்றத்துக்காகத் தமிழகமெங்கும் மாவோயிஸ்டு அமைப்பினர் மீது தேடுதல் வேட்டை நடத்துகிறது போலீசு. சிவகங்கையில் நட்ட நடுவீதியில் ரிமோட் குண்டு வைத்து தி.மு.க. நகராட்சித் தலைவரை தி.மு.க.காரனே கொலை செய்கிறானே, அந்தப் படுகொலைக்கு என்ன காரணம்? அன்று உள்ளாட்சித் தேர்தலையும், இன்று கூட்டுறவுத் தேர்தலையும் ரத்து செய்ய வைத்த வன்முறைக்கான காரணம் என்ன? தமிழ் நாட்டையே கொள்ளைக் காடாக்கி வரும் கழக வீரப்பன்கள் மீது எந்த அதிரடிப்படை ஏவப்பட்டிருக்கிறது?
//

நிச்சயம் ஏவப்படும். அவ்வாறு ஏவப்படும் அதிரடிப்படையின் பெயர் மக்களது ஓட்டுக்கள். அந்த ஓட்டை பொறுக்க அரசியல் கட்சிகள் அலையும்வரைக்கும், மக்கள் கையில் கண்ட்ரோல் இருக்கும். அது அடுத்த தேர்தலில் தெரியும். ஒரு ஆளும் கட்சிக்கு தன் ஆளும் கட்சி ஆட்கள் வெற்றி பெற்ற வெறியாட்டத்தை கட்டுப்படுத்தும் தேவை இருக்கிறது. அந்த தேவையைப் புரிந்துகொள்ளாத ஆட்சி வெகுவிரைவில் மக்களால் வாக்குக்கள் மூலம் நீக்கப்படும். நீக்கப்பட்டும் இருக்கிறது தமிழக வரலாற்றில்.

//
"நக்சல் ஒழிப்பு' நடவடிக்கையில் காட்டப்படும் இந்தத் தீவிரத்தில் ஒரு சதவீதமாவது "தீண்டாமை ஒழிப்பு', "லஞ்ச ஒழிப்பு', "மதவெறி ஒழிப்பு' நடவடிக்கைகளில் காட்டப்பட்டதுண்டா? காடு மலையெல்லாம் தேடி அலைய வேண்டிய தேவையே இல்லாமல் கண்முன்னால் காட்சி தரும் இந்தக் கிரிமினல் குற்றங்களை ஒழிக்க ஒரு அமைதிப்படையாவது ஏவப்பட்டதுண்டா?
//

தீண்டாமை ஒழிப்பு, லஞ்ச ஒழிப்பு, மதவெறி ஒழிப்பு ஆகியவையும் எடுக்கப்படவேண்டிய நடவடிக்கைகள்தான். ஆனால், ஒரு திருடனை பிடிக்காத போலீஸாருக்கு இன்னொரு கொலைகாரனை பிடிக்க தார்மீக உரிமை இல்லை என்ற இது போன்ற அபத்த வாதங்களை முன்வைப்பதில் உங்களுக்கே வெட்கமாக இல்லையா?
மேலும், எப்போதிருந்து இந்த மாற்றம்? சமூக சீர்திருத்தம் என்பது திரித்தல் வாதம் என்றும் புரட்சி வழியே சரியான வழி என்றும்தானே சொல்லிவந்தீர்கள்? சமூக சீர்திருத்தம் செய்வதன் மூலம் இந்தியாவை மாற்றிக்காட்டிய காந்தி உங்களுக்கு எதிரியாகத்தானே இருந்தார்? இந்தியாவில் எந்த சமூக சீர்திருத்தங்களில் கம்யூனிஸ்டுகள் இருந்திருக்கிறார்கள்? புரட்சி வந்தால் போதும் எல்லாம், பூத்து குலுங்கிவிடும் என்பதுதானே இதுவரை உங்களது கோஷமாக இருந்துவந்திருக்கிறது? அமைதி வழியே, மக்கள் திரளைப் பேச்சினால் மனம் மாற்றி அறவுணர்வால் ஊக்குவித்துத் தம் பின்னே திரட்டிச் சமூக சீர்திருத்ததை செய்து உலகை மாற்றிக்காட்டிய காந்தி, நாராயணகுரு போன்றவர்களை உங்களது எதிரிகளாகத்தானே வரித்துக்கொண்டிருந்தீர்கள்? இப்போது மனமாற்றம் வந்த காரணம் என்ன? அல்லது இது ஒரு டெம்பரரி அம்னீசியாவா? அல்லது புகை மூட்டப் போர்த்தந்திரமா?

//
"வன்முறையா மென்முறையா' என்பதல்ல பிரச்சினை. இந்த அரசமைப்பில் ஐக்கியமாகி, அரசு சன்மானங்களைப் பொறுக்கித் தின்னவும், பன்னாட்டு நிறுவனங்களுக்குத் தரகு வேலை செய்யவும், மக்கள் சொத்தைக் கொள்ளையடித்துப் பங்கு போட்டுக் கொள்ளவும் ஆயுதம் ஏந்தி மோதிக்கொள்வதில் ஆளும் வர்க்கத்துக்கு எந்த ஆட்சேபமும் இல்லை.
//

என்ன சீனாவை பற்றி சொல்கிறீர்களா? அப்படியே சீனாவின் மாவோயிச சோசலிச அரசை எப்படி இவ்வளவு துல்லியமாக வருணித்தீர்கள்! நேரே போய் அனுபவம் நிறையவோ? அந்த வரிகளை மேற்கோள் காட்டுகிறேன் - ‘இந்த அரசமைப்பில் ஐக்கியமாகி, அரசு சன்மானங்களைப் பொறுக்கித் தின்னவும், பன்னாட்டு நிறுவனங்களுக்குத் தரகு வேலை செய்யவும், மக்கள் சொத்தைக் கொள்ளையடித்துப் பங்கு போட்டுக் கொள்ளவும்’. இதில் இன்னொரு அம்சம் பாருங்கள். இந்த ரஷ்யாவின் அரசும் இதே போலத்தான் இருக்கிறது- ஆனால் அவர்கள் சோவியத், லெனினியம், சோசலிசம் என்று சும்மா வார்த்தை ஜாலமெல்லாம் காட்டாமல் நேரடியாக ‘சாவரின் டெமாக்ரசி’ என்று சொல்லி விடுகிறார்கள். யாருடைய சாவரினிடி என்பது தெளிவில்லை. கேஜிபியின் சாவரினிடி என்பது உங்களுக்குத் தான் தெரியுமே. நீங்கள் புரட்சி நடந்ததும் செய்யப் போகிற முதல் வேலையே இந்த கேஜிபியை நகல் எடுத்து ஒரு ரகசியப் போலிஸ் அமைப்பைக் கட்டுவதுதானே?

// மக்கள் யுத்தக் குழுவினர் சந்திரபாபு நாயுடுவுக்கு வைத்த குண்டைக் காட்டிலும், சிவகங்கையில் வைக்கப்பட்ட ரிமோட் குண்டுதான் நவீன தொழில்நுட்பம். அவ்வாறிருந்தும் சிவகங்கையில் தேடுதல் வேட்டை கிடையாது, காரணம், இது திமுக ஆட்சி என்பது மட்டுமல்ல; இத்தகைய வன்முறைகள் எதுவும் ஆளும் வர்க்கத்துக்கு எதிரானவையல்ல என்பதுதான் அடிப்படைக் காரணம்.
மாறாக, ""இந்த கொள்ளைக்கார அரசமைப்பைத் தூக்கியெறிவதற்காக ஆயுதம் ஏந்தவேண்டும்'' என்று கூறுவதனால்தான், ஜனநாயகத்தின் எல்லாத் தூண்களும் "தீவிரவாதிகள்' என்று முத்திரை குத்தி நக்சல்பாரிகள் மீது பாய்ந்து படுங்குகின்றன.
//

அதெப்படி, கொள்ளைக்கார அரசமைப்பை தூக்கி எறிவதற்கு கொலைகார அமைப்புதான் வேண்டுமா?
மக்கள் வாக்களிக்கிறார்களே. அவர்களிடம் சொல்லுங்கள். அடுத்த முறை தேர்தலில் நின்று யாராரைக் கொல்லப் போகிறீர்கள், எப்படி, எத்தனை ஆயிரம் பேரைக் கொன்றால் எவ்வளவு மாறுதல் வரும் என்று பட்டியல் போட்டு வைத்திருப்பீர்களே அதையெல்லாம் எடுத்து விடுங்கள் மேடைகளில். எவ்வளவு ஆதரவு திரண்டு வருகிறது என்று பார்க்கலாம்.

முதலாவது, இது கொள்ளைக்கார அமைப்பு அல்ல. கொள்ளைக்கார அமைப்பு என்பது சோசலிஸம். இது ஜனநாயக அமைப்பு. இங்கு ஆளும் கட்சியின் அச்சுறுத்தல் இல்லாமல், மக்கள் தாம் விரும்பும் கட்சிக்கு ஓட்டுப்போடலாம். தங்கள் சாதிக்கட்சிக்கு ஓட்டுப்போடலாம். தங்கள் மதக்கட்சிக்கு ஓட்டுப்போடலாம். தங்கள் குடும்ப உறுப்பினர்கள் இருக்கும் கட்சிக்கும் ஓட்டுப்போடலாம். மக்களுக்கு நல்லது செய்வார்கள் என்று நினைத்தும் எந்த கட்சிக்கும் ஓட்டுப்போடலாம். அது மக்கள் விருப்பம். அல்லது திமிர் பிடித்துத் தேர்ந்தெடுக்கப் பட எந்த வாய்ப்பும் இல்லாத ஒரு கோமாளிக்குக் கூட வாக்களிக்கலாம். நீங்கள் தேர்தலில் நின்றால் உங்களுக்குக் கூட ஒரு நூறு ஓட்டுகள் விழுந்தாலும் விழும், யார் கண்டது? நின்று பாருங்களேன்? என்ன குறைந்து விடும்? நீங்களோ ஒன்றும் சத்திய சந்தர் அல்ல. அறம், தருமம், நேர்மை இதெல்லாம் உங்கள் கருத்துப்படி பூர்சுவா மாயங்கள். தேர்தலில் நாளை நிற்கலாம். அடுத்த நாள், (தோற்றதும்) , மறுபடி ஆயுதப் போராட்டமே வழி என்றும் அறிவிக்கலாம். இதெல்லாம் மக்களுக்கு ஒன்றும் பெரிய விஷயமே இல்லை. அரசியல் வாதி என்றாலே பொய் சொல்வார் என்பது அவர்களுக்குத் தெரியும். உங்களுக்குத்தான் மற்றவர்கள் எல்லாம் பொய்யர்கள் நாம் மட்டும் சத்தியவான் என்று ஒரு பிரமை இருக்கிறதே.
தைரியமாகத் தேர்தலில் போட்டி இட்டு வானத்தை வில்லாக வளைப்போம் என்று பொய் சொல்லுங்கள். ஏற்கனவே அப்படித்தானே கற்பனை கம்யூனிஸ சமுகம் பற்றி சொல்லி இளைஞர்களை மூளைச்சலவை செய்துகொண்டிருக்கிறீர்கள்? ஒரு பக்கம் இயேசுவின் இரண்டாவது வருகை என்ற பொன்னுலகம் வருகிறது என்று அமெரிக்க ஆதரவாக கிறிஸ்துவர்களை உருவாக்க கூட்டம் சேர்க்கிறார்கள். நீங்கள், கம்யூனிஸ பொன்னுலகம் வருகிறது என்று கூட்டம் சேர்க்கிறீர்கள். என்ன வித்தியாசம்? பைத்தியக்காரனை சுற்றியும் பத்துப்பேர்!

//
குறிப்பாக, தனியார்மயதாராளமயக் கொள்கைகளை எதிர்த்துக் கிளர்ந்தெழும் உழைக்கும் மக்கள், நாளை கம்யூனிசப் புரட்சியாளர்களின் தலைமையில் அணிதிரண்டு விடுவார்களோ என்ற அச்சம்தான் ஆளும் வர்க்கங்களை நடுங்கச் செய்கிறது. துப்பாக்கிகாடுபயிற்சி என்பதல்ல எதிரிகளின் அச்சத்துக்குக் காரணம். மார்க்சியம்லெனினியம்மாசேதுங் சிந்தனை என்ற கம்யூனிசச் சித்தாந்தம்தான் அவர்களை அச்சுறுத்துகிறது. கம்யூனிசப் புரட்சியாளர்களின் உறுதியும் விடாப்பிடியான முயற்சியும் அவர்களுக்குப் பீதியூட்டுகிறது.
//

காமெடி கீமடி பண்ணலையே? தனியார் மயக்கொள்கைகளை எதிர்த்து கிளர்ந்தெழுகிறார்களா ? எங்கே? எல்லோரும் தனியார் மயத்தை ஆதரிக்கிறார்கள். அதன் மூலம் வேலைவாய்ப்பு பெருகுவதை வரவேற்கிறார்கள். மார்க்ஸியம் லெனினியம் மாசேதுங் சிந்தனை என்ற கான்ஸர் இந்த இளைஞர்களை வழிதவறிப்போகவைத்து, வளரும் தொழில்நுட்பம், பொருளாதாரத்தை பாதிக்கிறது என்பதனை மக்கள் புரிந்துகொண்டே இருக்கிறார்கள். கம்யூனிஸ புரட்சியாளர்களின் மடத்தனமும், பைத்தியக்காரத்தனமும் மக்களுக்கும் அரசில் இருக்கும் மக்கள் பிரதிநிதிகளுக்கும் பீதியூட்டுகிறது.
இப்போதுதான் பொருளாதாரத்தை கழுத்திபிடித்து திருகி இந்தியாவில் தொழில்முனைவோர்களையும், தொழில்துவங்குபவர்களையும் கழுத்தில் கயிறு போட்டுகட்டி, இவ்வளவுக்கு மேல் உற்பத்தி செய்யக்கூடாது, இங்குதான் இவன் தான் தொழில்துவங்க வேண்டும் என்று லைசன்ஸ் கோட்டா சாம்ராஜ்யம் அழிந்து தொழில்முனைவோர்கள் பொருளாதார சுதந்திரம் பெற்று வேலைகள் அதிகரிக்க ஆரம்பித்துள்ளன. இன்று "வேலை காலி இல்லை" போர்டுகள் தொழிற்சாலைகளின் முகப்புகளை அலங்கரிக்கவில்லை. இன்று உண்மையிலேயே தொழிலாளர்கள் எந்த தொழிலுக்கும் போவதற்கான சுதந்திரம் பெற்றிருப்பதால், அவர்களது வலிமை அதிகரித்துள்ளது. இவர்கள் தனியார் மயத்தை எதிர்க்கிறார்களா? எந்த உலகத்தில் இருக்கிறீர்கள்?
ஆமாம், கஞ்சா அல்லது ஸ்பீட் ஏதாவது சாப்பிட்டு விட்டு இந்தத் தலையங்கம் எழுத வந்தீர்களா என்ன? மார்க்சியம், லெனினியம், மாவோயிசச் சித்தாந்தம் அவர்களை அச்சுறுத்துகிறதா? சோவியத் ரஷ்யா என்று ஒரு பெரிய மண் கோட்டை 1989 இல் தகர்ந்து பொடியானது, நினைவிருக்கிறதா? இன்று லெனினின் சிலைகள் கிழக்கைரோப்பா முழுவதும் காலில் உடைந்து தலை குப்புறக் கிடக்கின்றன, அதாவது தெரியுமோ? செய்தித்தாள்கள் படிக்கிறீர்களோ? இல்லை அதெல்லாமும் கற்பனை வாழ்க்கைதானா? மாவோயிசம் என்று ஏதோ சொன்னீர்களே, அந்த மாவோவின் சாம்ராஜ்யமே இன்று கலகலத்துப் போய் கம்யூனிஸ்டு கட்சியில் பூர்சுவாக்கள் சேர்வது தவறில்லை, மேலும் சொத்துரிமை கொடுக்காது மக்களை ஊக்குவிக்க முடியாது என்று சொத்துரிமை உண்டு என்று அறிவித்துள்ளது, மேலும் முதலாளியம் என்பது ஒன்றும் ரத்தக் காட்டேரி இல்லை என்று கூறி அமெரிக்காவோடு கூட்டு சேர்ந்து இருபதாண்டுகள் ஆகிவிட்டன, அதுவாவது தெரியுமா?

//
இதனை மறைத்துக் கொண்டு, "வேலையில்லாத பட்டதாரிகளும் விரக்தியுற்ற இளைஞர்களும்தான் நக்சல்பாரிகளாக மாறிவிடுவதாக'க் கதையளக்கிறார்கள். "இந்த சமூகப் பொருளாதாரப் பிரச்சினைகளைத் தீர்த்துவிட்டால் நக்சலியம் ஒழிந்துவிடும்' என்று கனாக் காண்கிறார்கள். வேலையின்மை, வறுமை காரணமாக நக்சலியம் பரவுகிறது (திருட்டு, விபச்சாரம் போன்ற கிரிமினல் குற்றங்கள் பரவுவதைப் போல) என்று கூறுவதன் மூலம் நக்சல்பாரி அரசியலையே கிரிமினல் குற்றமாகச் சித்தரிக்கிறார்கள்.
//

வேலையில்லா பட்டதாரிகளும் விரக்தியான இளைஞர்களும்தான் நக்ஸல்பாரிகளாகவும், மத பயங்கரவாதிகளாகவும், ஆனார்கள். சமூகத்தில் வேலைவாய்ப்பு பெருக பெருக நக்ஸலிசம் மட்டுமல்ல, பொதுவாகவே எந்த எதிர்ப்பு அரசியல் உணர்வும் குறைகின்றது.
நக்ஸல்பாரி அரசியல் கிரிமினல் குற்றம்தான். ஏனெனில், ஒரு இயக்கம் என்ன காரணத்தினாலும் இன்னொரு மனிதனது உயிரை பறிக்க உரிமை அற்றது. அது நக்ஸல்கள் கொல்வதாக இருந்தாலும், அது மத பயங்கரவாதிகள் குண்டு வைப்பதாக இருந்தாலும் அது ஒன்றுதான்.
வன்முறையை தன் வழியாகப் பகிரங்கமாக அரசியலாக ஏற்கும் ஒவ்வொரு இயக்கமும் கடுமையாக ஒடுக்கப்படவேண்டும். வார்த்தைகள் மூலம் தங்களது வாதத்தை சொல்ல முடியாவதவர்கள், வரப்போகும் கற்பனை கம்யூனிஸ சமுதாயத்திற்காகவோ, அல்லது கிறிஸ்துவின் இரண்டாம் வருகை பொன்னுலகுக்காகவோ, உழைத்துப் போராடி வாழும் பொதுமக்களைக் "களையெடுப்பதையோ" அல்லது மதவெறி காரணமாக, தன் மதத்தை சாராதவர்களை கொல்வதையோ ஒருபோதும் அங்கீகரிக்க முடியாது. அத்தகைய இயக்கங்களை வளரவும் விடக் கூடாது.
நீங்களோ இத்தகைய கொலைகளை உங்களது கொள்கை வழியில் சரியானது என்று முழுமனதாக நம்புகிறீர்கள்.
இப்படிக் கொலை வெறிக் கொள்கையைத் தாமே கொண்டு உள்ளவர்கள் எந்த தார்மீக அடிப்படையில் அல்லது என்ன தர்க்கப்படி இந்தியாவிலும் மற்ற நாடுகளிலும் நடக்கும் வன்முறையை கண்டிக்க உரிமை பெறுகிறீர்கள்? நீங்கள் இன்னமும் நினைத்தவர்களை எல்லாம் கொல்லும் சக்தியைப் பெறவில்லை என்பதால் உங்கள் படுகொலைத் திட்டங்கள் நெறியற்றவை என்பது மறைந்து விடுமா என்ன?

//
விரக்தியுற்றவர்கள்தான் நக்சல்பாரிகளாகிறார்கள் என்ற கூற்று உண்மையாயிருப்பின், தற்கொலை செய்து கொண்ட ஒரு லட்சம் விவசாயிகளும் நக்சல்பாரிகளாகியிருக்க வேண்டும். நக்சல்பாரிகளை உந்தித் தள்ளும் உணர்ச்சி, விரக்தி அல்ல; அது சமூக அநீதிகளுக்கு எதிரான ஆவேசம். அவர்களை வழிநடத்துவது மார்க்சியம்லெனினியம் என்ற அறிவியல் பார்வை. நக்சல்பாரிகள் சமூகத்தைத் தம் தோளில் சுமப்பவர்கள், மக்கள் நலனுக்காகத் தம் சொந்த வாழ்வின் இன்பங்களைத் தாமே முன்வந்து துறப்பவர்கள். நக்சல்பாரிகள் விரக்தியுற்ற இளைஞர்களுமல்ல, கம்யூனிசம் சோற்றால் அடித்தால் செத்துவிழும் கொள்கையுமல்ல.
//

தற்கொலை செய்துகொண்ட விவசாயி ஒரே ஒருவராக இருந்தாலும், அந்த அரசு கலைக்கப்படும் இதே இந்திய மக்களால். கலைக்கப்பட்டும் இருக்கிறது.

ஆனால், கலைக்கவே முடியாத, ராணுவ சர்வாதிகாரத்தின் கீழ், செயற்கையாக உருவாக்கப்பட்ட பஞ்சத்தினால் செத்த சோசலிஸ விவசாயிகள் பற்றி அதே நேர்மையுடன் உங்களால் எழுத முடியுமா?

முட்டாள்கள் தடுக்கி விழுவார்கள் என்று சொல்கிறோம் என்று வையுங்கள். உடனே அனைத்து முட்டாள்களும் தடுக்கித்தான் விழுவார்கள் என்று சொல்கிறோம் என்றா எடுத்துக் கொள்வது? அபாரமாகத்தான் வேலை செய்கிறது உங்கள் கற்பனை? (அது நையாண்டி. ஏதோ உண்மையிலேயே பாராட்டுகிறேன் என்று கருத வேண்டாம். உங்களால் சின்ன வாதங்களையே பின்பற்ற முடியவில்லை என்பது எனக்கு ஓரளவு உங்கள் மன ஆரோக்கியம் பற்றிக் கவலைப் பட வைக்கிறது. ஆந்திராவிலும், ஒரிஸ்ஸாவிலும் நக்சல்பாரிகளாக ஆனவர்களில் பட்டினியைச் சந்தித்த விவசாயிகளில் யாருமே இல்லையா என்ன? கட்டாயம் இருப்பார்கள்-

நக்ஸல்பாரிகள் சமூக அநீதிகளால் உருவாகிறார்கள் என்று நீங்கள் சொல்லிக்கொள்வது ஒரு சந்தர்ப்ப வாதம். நக்ஸ்ல்பாரிகள் தங்களது கொலைகளை நியாயப்படுத்திக்கொள்ள சொல்லும் ஒரு சாக்கு. அவ்வளவுதான்.

என்னுடைய வருத்தம் என்னவாக இருந்தாலும், மற்றொரு அப்பாவி மனிதன் மீது என்னுடைய வன்முறையை பிரயோகிப்பது சரியல்ல என்று ஒப்புக்கொள்ளும் அமைப்புதான் மக்களது அமைப்பு. அந்த அமைப்பாக நீங்கள் ஆகும்போது அதுபற்றி பேசலாம்.
ஆனால், மத பயங்கரவாதிகள் கூறுவதும், மார்க்ஸிய பயங்கரவாதிகள் கூறுவதும் ஒன்றேதான் என்னும்போது இன்னும் உங்கள் இரு கூட்டங்கள் மீதும் மக்களுக்குப் பயம்தான் அதிகரிக்கிறது. மத பயங்கரவாதிகள் கூறுகிறார்கள் ‘நீ நான் கும்பிடும் தெய்வத்தை வணங்காதவன் என்ற குற்றம் இழைப்பவன். அதனால் உன்னைக் கொல்வது நியாயமானது.’

கம்யூனிஸ பயங்கரவாதிகள் கூறுகிறார்கள்‘நீஎன்னுடைய கற்பனை உலகத்தை அங்கீகரிக்காதவன். அதுவே உன் குற்றம், அதனால் உன்னை களையெடுப்பது நியாயமானது. உன்னைக் கொல்வோம்.’ இவ்வாறான வாதங்கள், மேலும் மேலும் சமூக அநீதிகளைத்தான் கொண்டுவரும். கொண்டு வந்திருக்கிறது.

ஏனேனில் மார்க்சியம் கிறிஸ்துவ இறையியல் போன்று, கற்பனையில் பொன்னுலகம் படைக்கும் கற்பனைவாதம், கருத்துமுதல்வாதம். இதை மக்கள் மீது திணித்தே தீர்வேன் என்னனம் நக்ஸல்பாரிகள் சமூகத்தின் கேன்ஸர்கள். மக்கள்நலனுக்காகச் செய்கிறோம் என்று அந்த மக்களையே கொன்று புதைகுழிக்குள் அனுப்புபவர்கள். அவ்வாறு கொன்றபின்னால், அந்த பிணத்திடமே, உன் நலனுக்காகத்தான் உன்னை கொன்றோம் என்று சொல்லும் பிளவாளுமை கொண்ட மனநலம் பிசகியவர்கள். கம்யூனிஸம் சோற்றால் அடித்தால் செத்துவிழும் கொள்கையாக இல்லாமல் இருக்கலாம். ஆனால் என்ன செய்வது? எல்லா மனம் பிறழ்ந்தவர்களும் தங்களே வரித்துக்கொண்ட உலகத்தில் நியாயவான்களாகவே இருக்கிறார்கள்.

//
நக்சல்பாரிகளின் அரசியலைத் தவறு என்று யாராலும் வாதாட முடியாது. நக்சல்பாரி இயக்கத்தின் ஒரு சாதாரணத் தொண்டன் எழுப்பும் அரசியல் கேள்விக்கு எந்த ஓட்டுப் பொறுக்கித் தலைவனாலும் பதில் சொல்ல முடியாது. நக்சல்பாரிகளை அரசியல் ரீதியாக எதிர்கொள்ள ஆளும் வர்க்கம் அஞ்சுகிறது. எனவேதான் அச்சுறுத்துகிறது, அவதூறு செய்கிறது, மக்களிடமிருந்து தனிமைப்படுத்த முயற்சி செய்கிறது.
//

மனநலம் பிறழ்ந்தவர்கள் என்று சொல்லி நான்கு வரிகள் தாண்டுவதற்குள் அதை நிரூபிக்க ஒரு வரியை எழுதி விட்டீர்கள். முன்னால் சொல்லிய படி உண்மையிலேயே உங்களுக்கு நகைச்சுவை உணர்வு கூடுதல்தான். ‘நக்சல்பாரிகளின் அரசியலைத் தவறு என்று யாராலும் வாதிட முடியாதா’? ஏன்? எது தடுக்கும்? நான் இதோ வாதிட்டுக் கொண்டிருக்கிறேனே. இந்தியாவில் உள்ள சிறு நில விவசாயிகளில் 90 சதவீதத்துக்கு மேல் உங்களை மறை கழண்டவர்கள் என்றுதானே கருதுகிறார்கள். இல்லாவிடில் எதற்கு நேற்று வந்த அரசியல் வாதி பின்னாலெல்லாம் ஓடுகிறார்கள். (உதா: விஜய்காந்த், ராகுல் காந்தி, ப்ரியங்கா, தயாநிதி மாறன்) பல பத்தாண்டுகளாகத் தொண்டை வறளக் கத்திக் கொண்டு, காகிதத்தில் மசியைத் தடவி லட்சக்கணக்கான காகிதங்களை வீணாய் அடித்து உங்கள் புராணத்தை விற்கப் பார்க்கிறீர்கள், ஒரு பயல் லட்சியம் செய்கிறானா? ஐயா, நாற்பதாண்டுகளாக அலைகிறீர்கள் அரசியல் அதிகாரம் வேண்டும் என்று, சரி ஒரு மாதம் ஆண்டு பாருங்கள் என்று உங்களைக் கூப்பிட்டு ஒரு முனிசிபாலிடியாவது, பஞ்சாயத்தாவது கொடுக்கிறார்களா? உங்கள் அரசியல் உதவாக்கரை அரசியல் என்பதால்தானே அதை அலட்சியம் செய்கிறார்கள். அவர்கள் ‘அட போங்கப்பா, பொழைப்பத்த பசங்க’ என்று விரலால் தள்ளுகிறார்களே, அதில் எந்தப் பகுதி உங்களுக்கு இன்னமும் புரியவில்லை?
நக்ஸல்பாரி அரசியல் தவறு என்று நான் வாதாடுகிறேன். நான் கேட்ட கேள்விகள் இங்கே இருக்கின்றன. நக்ஸல்பாரி இயக்கத்தின் எந்த ஒரு கொலைவெறியனாலும், தலைவனானாலும் அவற்றுக்கு பதில் சொல்ல முடியாது.
அதனால்தான், என்னை போன்ற பொதுமக்களை நக்ஸல்பாரி இயக்கங்கள் கொலைவெறி கொண்டு துப்பாக்கி எடுத்து வன்முறைமூலம் வாயை மூடவைக்க முயல்கின்றன
ஓட்டுப்பொறுக்கித் தலைவனே இந்தியாவின் உன்னதமான தலைவன். அவனே மக்களின் ஓட்டுக்களை ஒவ்வொன்றாக பொறுக்க விழைகிறான். ஒவ்வொரு ஓட்டுக்கும் அவன் தன்னை மக்களின் பிரதிநிதியாக ஆக்கிக்கொள்ள வேண்டியவன். அவனே உண்மையான மக்கள்தலைவன். அல்ல, அந்தச் சொல் தவறான சொல், அவனே மக்கள் பிரதிநிதி.
மக்கள் வீசும் ஓட்டுக்களை பொறுக்கும் உன்னத மக்கள் பிரதிநிதிகளுக்குத் தலைவணங்குகிறேன்.

//
பெரியகுளம் சம்பவத்தையொட்டி நக்சல்பாரிகளுக்கு எதிராக அரசும் ஊடகங்களும் மேற்கொண்டு வரும் பொய்ப்பிரச்சாரத்தை நாம் முறியடிக்க முடியும். ஆனால், மேற்கூறிய பிரச்சாரங்கள் மக்கள் மத்தியில் எடுபடவில்லையென்றோ, மாவோயிஸ்டுகளின் "ஆயுதப் போராட்டத்துக்கான' நியாயத்தை தமிழக மக்கள் புரிந்து கொண்டு விட்டார்கள் என்றோ அதற்குப் பொருள் அல்ல. பெரியகுளம் சம்பவத்தையொட்டி மாவோயிஸ்டு கட்சியின் தமிழ் மாநிலக் குழு வெளியிட்டிருக்கும் அறிக்கையே இதற்குச் சான்று கூறுகிறது.
""மாவோயிஸ்டுகளின் கொள்கைகளையும் இலட்சியங்களையும் மறைத்து விட்டு அவர்களை வெறும் ஆயுத மோகம் கொண்ட தீவிரவாதிகளாகக் காட்ட ஊடகங்கள் முயற்சிக்கின்றன''... ""ஆயுதப் போராட்டத்திற்கான சிறிய தயாரிப்புகளையே பெரும் பயங்கரவாதமெனச் சித்தரித்துப் பயங்கரவாத பீதியை உருவாக்கி வருகிறது கருணாநிதி அரசு'' என்று கூறும் அந்த அறிக்கை, ""மாவோயிஸ்டுகள் யார், அவர்கள் ஏன் ஆயுதம் ஏந்துகிறார்கள்?'' என்று சுருக்கமாக விளக்குகிறது.
"மாவோயிஸ்டுகள் யார், அவர்களுடைய கொள்கை என்ன, அவர்கள் ஏன் ஆயுதம் ஏந்துகிறார்கள்' என்பதையே மக்களுக்கு விளக்கிப் புரியவைக்க வேண்டும் என்ற நிலையில் இருக்கும் ஒரு அமைப்பு, ஆயுதப் போராட்டத்தைத் தொடங்கிவிட்டதாகக் கூறுவது சிறுபிள்ளைத்தனம் என்பதை விளக்கத் தேவையில்லை. தமிழகத்தில் கடந்த 7 ஆண்டுகளில் இவர்கள் சுற்றி வளைத்துக் கைது செய்யப்படுவது இது மூன்றாவது முறை.
//

"ஆயுதப் போராட்டத்திற்கான சிறிய தயாரிப்புகளையே".. ஓஹோ பெரிய தயாரிப்புகள் செய்யும் போது போலீசுக்கு சொல்லி அனுப்புவார்களா?
ஏன் ஆயுதம் ஏந்துகிறார்கள் என்று விளக்கும் ஒரு கட்சி ஆயுதப்போராட்டத்தை துவங்கிவிட்டதாக நினைக்காமல் என்ன செய்யமுடியும்? சற்றே எழுதியதை படித்து பார்த்தால், எழுதியதன் அபத்தம் விளங்கும்.

//
பேருந்து எரிப்பு சம்பவத்தின் தொடர்ச்சியாக சனவரி, 2000இல் தோழர் ரவீந்திரனை போலீசு காவலில் வைத்து சித்திரவதை செய்து சுட்டுக் கொன்று விட்டு, அதனை மோதல் கொலை என்று புளுகியது போலீசு. அது தி.மு.க. ஆட்சிக்காலம். பின்னர், நவம்பர், 2003இல் தருமபுரி மாவட்டம் ஊத்தங்கரை வட்டாரத்தில் 26 தோழர்கள் கைது செய்யப்பட்டு பொடாவில் சிறை வைக்கப்பட்டனர். தோழர் சிவா சுட்டுக் கொல்லப்பட்டார் அது ஜெயலலிதா ஆட்சிக் காலம். இப்போது பெரியகுளம் சம்பவம்.
பெரியகுளத்தில் நடந்தது என்ன? என்பது பற்றி மாவோயிஸ்டு கட்சி வெளியிட்டுள்ள அறிக்கை எதுவும் கூறவில்லை. ஆனால், முன்னர் ரவீந்திரன் கொலை செய்யப்பட்டபோதும், ஊத்தங்கரையில் 26 பேர் சுற்றி வளைத்துக் கைது செய்யப்பட்ட போதும், மக்கள் ஆதரவு அடித்தளம் கூட இல்லாமல் ஆயுதக் குழுக்களைக் கட்டும் இவர்களுடைய சாகசவாதம் பற்றி நாம் விமரிசித்தோம். மாவோயிஸ்டுகள் கோபப்பட்டார்கள். தருமபுரி மாவட்டத்தில் ஏராளமான மக்களைத் திரட்டியிருப்பதாகவும், அம்மாவட்டம் ஒரு ஆயுதப்போராட்ட முனையாக உருவாகியிருப்பதாகவும் வலிந்து வாதாடினார்கள்.
//

இதன்மூலம் நீங்கள் சொல்வது தெள்ளென தெரிகிறது. மக்களை வெறியேற்றி அவர்களை முழுநேர கொலைகளுக்குத் தயார் செய்யவேண்டும் பிறகுதான் ஆயுத போராட்டம் என்ற உங்கள் உளறல் உங்களை நன்றாகவே காட்டிக்கொடுக்கிறது.
ஆகவே ஆயுதம் தாங்கிக் கொல்வது உங்களுக்கு தவறான செயல் இல்லை. ஆகவே, அவர்கள் இன்றைக்கே கொல்வேன் என்று சொல்கிறார்கள். நீங்கள் சற்று காலம் கழித்து கொல்லலாம் என்று சொல்கிறீர்கள். அவ்வளவுதான்.
ஆகவே நீங்கள் இருவருமே ஒரே வன்முறை குட்டையில் ஊறும் விஷ மட்டைகள்.
பிறகு ஏன் போலிஸ் உங்களையும், மாவோயிஸ்டுகளையும் கொல்வது தவறு என்று சொல்கிறீர்கள்? உங்கள் கொள்கையையேதான் உங்கள் பால் திருப்புகிறார்கள் போலிசார்?

//
தற்போது பெரியகுளம் பகுதி! இங்கே மாவோயிஸ்டு அமைப்பிற்கு மக்கள் மத்தியில் அரசியல் ரீதியான செல்வாக்கு ஏதும் இல்லை. அன்றைய சம்பவத்தில் இவர்களுக்கு ஆதரவு கொடுத்ததற்காக அந்த வட்டாரத்து மக்கள் யாரும் கைது செய்யப்பட்டதாகவும் செய்தி இல்லை.
""மலைத்தொடர்கள், காட்டுப் பகுதிகள், பாதுகாப்பான மறைவிடங்கள் கொண்ட காட்டுப்பகுதிகளாக இருந்தால் போதும்; அங்கே ஆயுதக்குழுக்களைக் கட்டிவிடலாம், ஆயுதப்போராட்டத்தைத் தொடங்கிவிடலாம்'' என்று சிந்திக்கும் அளவுக்கு புவியியல்தான் இவர்களை வழிநடத்துகிறது; அரசியல் வழிநடத்துவதாகத் தெரியவில்லை. அரசியல் கண்ணோட்டம் ஏதுமற்ற இந்த அசட்டுத்தனமான நடவடிக்கையை இவர்கள் தம்முடைய சொந்த விவகாரமாகக் கருதிக் கொள்கிறார்கள். ""நாங்கள் போராடுகிறோம், நாங்கள் தியாகம் செய்கிறோம், உனக்கென்ன நட்டம்?'' என்ற சாகசவாதிகளுக்கே உரித்தான மனோபாவம்தான் இவர்களுடைய சிந்தனையை வழிநடத்துகிறது.
""கம்யூனிஸ்டுகள் தம்முடைய நடவடிக்கைகள் ஒவ்வொன்றுக்கும் மக்களுக்கு விளக்கமளிக்கக் கடமைப்பட்டவர்கள்'' என்ற மிக எளிய உண்மை கூட, எதிரிகளின் அவதூறுப் பிரச்சாரம் தொடங்கிய பின்னர்தான் இலேசாக இவர்களுக்குப் புரியத் தொடங்குகிறது.
//

எந்த மக்களுக்கு "விளக்கம்" அளிப்பீர்கள்? கொல்லப்பட்டவர்களுக்கா? இன்னும் உயிருடன் இருக்கும் மக்களுக்கா? விளக்கம் அளித்து விட்டுச் சுட்டுத் தள்ளினால் சுடப்படும் மனிதருக்கு மிகவும் மகிழ்வாக இருக்கும் என்று கருதி விட்டீர்களோ? ஒரு முறை உங்கள் காலைப் பார்த்து உங்கள் துப்பாக்கியால் சுட்டுக் கொள்ளுங்கள். அதை விடப் பல் மடங்கு அதிகம் துன்பம் உயிரை இழப்பது என்பது. அதை ஒரு முறை அனுபவித்துப் பாருங்கள் புரியும்.

//
எனவேதான் ""மாவோயிஸ்டுகள் ஏன் ஆயுதம் ஏந்துகிறார்கள்?'' என்று தங்களுடைய அறிக்கையில் மக்களுக்கு விளக்கம் தருகிறார்கள். ""சிறப்புப் பொருளாதார மண்டலம், கோக், பெப்சி, ரிலையன்சு, குஜராத் படுகொலைகள்..'' என்று ஒரு நீண்ட பட்டியலைக் கூறி ""இத்தகைய பயங்கரவாதங்களை எதிர்த்து ஒடுக்கப்பட்ட மக்கள் ஆயுதம் ஏந்துவது பயங்கரவாதமல்ல. அத்தகைய மக்கள் புரட்சிக்குத் தலைமை ஏற்கவே மாவோயிஸ்டுகள் ஆயுதம் ஏந்துகிறார்கள்'' என்கிறது அவர்களது அறிக்கை.
மேற்கூறிய பிரச்சினைகளுக்காக ஏற்கெனவே மக்கள் புரட்சி நடந்து கொண்டிருக்கிறதாம்! அதற்கு இவர்கள் தலைமை தாங்குகிறார்களாம்! புரட்சிக்குத் தலைமை தாங்கும் கம்யூனிஸ்டுகள், புரட்சியில் ஈடுபட்டிருக்கும் மக்களுக்குத் "தன்னிலை விளக்கம்' தந்து புரிய வைப்பதை நாம் இப்போதுதான் கேள்விப்படுகிறோம்.
//

நன்றி. இதே வகையாகத்தான் சற்று முன்னர் இதே கட்டுரையில் "தனியார் மயத்துக்கு எதிராக கிளர்ந்தெழும் மக்களை" பற்றி உங்கள் வரியும் இருந்தது. அதனால்தான் ஒரே குட்டையில் ஊறிய விஷ மட்டைகள் என்றும் நான் முடிவு சொன்னேன்.

//
சிறப்புப் பொருளாதார மண்டலமாக இருக்கட்டும், பிற தனியார்மய நடவடிக்கைகளாக இருக்கட்டும், அவற்றுக்கு எதிரான தன்னெழுச்சியான மக்கள் போராட்டங்கள் நடந்து கொண்டுதான் இருக்கின்றன. இந்த அரசமைப்பின் வரம்புக்குள்ளேயே தத்தம் கோரிக்கைகளை நிறைவேற்றிக் கொள்வதற்கு பல்வேறு மக்கட்பிரிவினர் நடத்தும் இத்தகைய போராட்டங்கள் அவை போர்க்குணமிக்கவையாக இருப்பினும் பொருளாதாரப் போராட்டங்களே.
//

அவை பொருளாதார போராட்டங்கள் மட்டுமின்றி, ஓட்டுப்பொறுக்கி அரசியலின் காரணமாக உருப்படியான விளைவைத்தரும் போராட்டங்களாகும். மேலும் பொருளாதாரம்தான் அரசியல் என்பதுதானே உங்கள் இறைதூதரின் அடிப்படை வாதமே. அதை எப்படி மறந்தீர்கள்?
பொருளாதாரப் பிரசினைகளுக்கு பொருளாதாரப் போராட்டம் நடத்தாமல் மக்கள் என்ன செய்வார்கள்? உங்கள் புரட்சி வெடித்து மலர்ந்து இந்தியாவில் ஒரு சைபீரியாவையும், ஸ்டாலினையும், நள்ளிரவு கைதுகளையும் உருவாக்கும் வரை மக்கள் சகித்துக் கொண்டு, எந்த ஜனநாயகப் போராட்டமும் நடத்தாமல் இருக்க வேண்டும் என்று சொல்கிறீர்கள் இல்லையா? கம்யூனிஸ்டுகளுக்கு இன்றைய பிரசினைகளைத் தீர்ப்பதில், மக்களுக்கு உடனடி நிவாரண முயற்சிகள் வழங்குவதில் பிரசினை தான். ஏனென்றால் அது வெறும் சீர்திருத்தம் தான். மக்களுக்கக புரட்சி என்பது போய், புரட்சிக்காக மக்கள், புரட்சி வரும் வரையில் கஷ்டபடடுங்கள் என்று சாபம் வழங்கும் உங்கள் மனநோய்தான் மார்க்ஸிய-மாவோயிச மனநோயோ?

//
மறுகாலனியாக்க எதிர்ப்பு என்ற அரசியல் கண்ணோட்டமோ, இந்த அரசமைப்பைத் தூக்கியெறிய வேண்டுமென்ற இலட்சியமோ அத்தகைய போராட்டங்களுக்கு இல்லை. அத்தகைய அரசியல் முழக்கங்களை முன்வைத்து மக்களைத் திரட்டுவதுதான் கம்யூனிஸ்டுகளின் கடமை. புரட்சிக்கு மக்களை அணிதிரட்டுவது என்பதன் பொருள் இதுதான். இப்படிப்பட்ட புரிதலோ, இவ்வாறு மக்களைத் திரட்ட முடியும் என்ற நம்பிக்கையோ மாவோயிஸ்டுகளுக்கு இல்லை.
//

ஏன் இந்த அரசமைப்பை தூக்கி எறியவேண்டும்? ஏன் மக்கள் அவ்வாறு நினைக்கவேண்டும்? தெருமூலையில் விளக்கொளி இல்லை, தெருக்கள் சரியாக இல்லை என்பது மக்களின் கோரிக்கையாக இருந்தால், அவர்கள் ஒவ்வொரு ஐந்தாண்டுகளும் மக்களிடம் வந்து ஓட்டு பொறுக்க வரும் உன்னத மக்கள் பிரதிநிதிகளிடம் கேட்கிறார்கள். "அய்யா உனக்கு ஓட்டுப்போடுகிறோம். ஆனால் சாலையை சரி செய், சாலையில் விளக்கொளி போடு" என்று கேட்கிறார்கள். அல்லது அத்தனை நாட்கள் காத்திருக்கத் தேவை கூட இல்லை. ஐந்தாண்டுகளில் பல முறை அந்தப் பிரதிநிதியைச் சந்தித்துத் தம் கோரிக்கையை நிறைவேற்றக் கோரி வற்புறுத்த அந்த மக்களுக்கு உரிமையும், கடமையும் உள்ளன. அதை அம்மக்கள் எப்படிப் பயன்படுத்துகிறார்கள் என்பது செயல் சாமர்த்தியம் சார்ந்தது. ஆயுதம் தாங்கி பெரும் போர் நடத்தச் சாமர்த்தியம் உள்ள வராக அம்மக்களைக் கற்பனை செய்கிறீர்கள், ஒரு சாதாரண எம் எல் ஏ வையோ அல்லது கார்ப்பரேசன் அதிகாரியையோ போய் விரட்டி வேலை வாங்கிக் கொள்ள அவர்களுக்கு முடியாதா? என்ன ஐயா கதை இது?
அந்த மக்கள் பிரதிநிதிகள் ஐந்தாண்டுகள் பிரதிநிதியாக இருக்கும்போது அந்த வாக்குறுதியை நிறைவேற்றலாம், நிறைவேற்றாமல் போகலாம். அப்போது அந்த மக்களிடம் அந்த அரசியல்வாதி திரும்ப வந்துதான் ஆகவேண்டும். காலதாமதமாக நடக்கலாம். இந்த ஐந்தாண்டுகள் கழித்து அடுத்த ஐந்தாண்டுகளில் நடக்கலாம். ஆனால், நடக்கும். அந்த மக்களிடமிருந்து பிரச்னை இல்லாமல் வெற்றி பெற விரும்பும் மக்கள் பிரதிநிதி மக்கள் கேட்டுக்கொண்டதை நிச்சயம் செய்வார்.
ஆனால், நீங்கள் என்ன சொல்கிறீர்கள்? புரட்சி வந்துவிடும். புரட்சி வரும் வரைக்கும் தெருவில் விளக்கொளி வராது. சாலை உருப்படியாக இராது. புரட்சி வந்ததும், ஆட்டமாட்டிக்காக எல்லா தெருக்களிலும் விளக்கு எரியும். எல்லா இடங்களிலும் புத்தம்புது சாலைகள் வந்துவிடும் என்று சொல்கிறீர்கள். அந்த புரட்சி வருவதற்காக எல்லோரும் உங்கள் கட்சியில் சேரவேண்டும் என்று சொல்கிறீர்கள். எவன் சேருவான் உங்கள் கட்சியில்? கையில் இருக்கும் கலாக்காய், மேலே இருக்கும் பலாக்காயை விட மேல் என்பது மக்களுக்கு தெரியாதா? அடைந்தால் மகாதேவி இல்லையேல் மரணதேவி என்று ஒரு கும்பல் உங்கள் பின்னால் வரும். இறுதியில் மரணத்தை தழுவும். அது தியாகமாக உங்களால் பாராட்டப்படும். இது தேவையா? இன்றைக்கே அந்த தெருவிளக்கொளியை கொண்டுவர அதிகாரிகளை சந்தித்தும், பிரதிநிதிகளை சந்தித்தும் நீங்கள் ஏன் வேலை செய்யக்கூடாது?

எவ்வளவு குறைபாடுள்ளதாக இருந்தாலும் ஜனநாயகம் மக்களுக்கு நல்லது. குறைபாடுகள் இல்லாத ஜனநாயகம் உலகத்தில் எங்கும் இல்லை.
ஜனநாயகம் குறைபாடுகள் கொண்டிருக்கிறது என்று நீங்கள் சொல்வதை வைத்து கம்யூனிஸ அடக்குமுறையையையும் அராஜகத்தையும் ஆயுத போராட்டத்தையும் அனார்கியையும் மக்கள் ஏற்றுக்கொள்வார்கள் என்று கனவு காண்கிறீர்கள்.

இந்த ஜனநாயகத்தின் குறைபாடுகளை அடையாளம் காணுங்கள். அதனை நீக்க ஜனநாயக முறைகளை நல்ல வழியே பின்பற்றி முயற்சி செய்யுங்கள். ஏதோ உங்களையே சாகச வீரர்களாகவும், வஜ்ஜிரம் போல உறுதி உள்ளவர்களாகவும் எல்லாம் பாரதம் பாடுகிறீர்களே, அந்த வீர தீர சாகசங்களை எல்லாம் இந்த சுண்டைக்காய் எம் எல் ஏக்களையோ, அரசு அலுவலர்களையோ, மந்திரிகளையோ கிடுக்கிப் பிடி போட்டு வாக்குறுதியை நிறைவேற்ற வைக்கும் செயல் சாமர்த்தியம் பெறப் பயன்படுத்துங்கள்.
ஆக்க பூர்வமாக அமைப்பை வளர்த்து விட முயலுங்கள். எப்போதும் எதை அழிக்கலாம் என்று அலையாதீர்கள். அது மனநோய். மார்க்ஸ், லெனின், ஸ்டாலின், மாவோ என்று நீங்கள் கட்டிச் சேர்க்கும் ஒவ்வொருவரும் ஒரு மனநோயாளிதான். நல்லதையே பார்க்கத் தெரியாத மடையர்கள். இருட்டையே ஒளி என்று வாதிட்ட மூடர்கள். அது அழிவுப் பாதை. நீங்கள் உங்களை அழித்துக் கொள்ள அனைத்து உரிமையும் உங்களுக்கிருக்கிறது. மக்களை அழிவுப்பாதையில் தள்ளாதீர்கள்.
அந்த உரிமை உங்களுக்குக் கிடையாது. நீங்கள் ஜனநாயக அமைப்பின் அனைத்துத் தற்காப்பு வழிகளையும் பயன்படுத்தி களை எடுக்கத்தான் படுவீர்கள்.
இந்த ஜனநாயகத்தின்மூலம் மக்கள் மேலும் வசதி வாய்ப்புகள் பெற முயற்சி செய்யுங்கள். இந்த ஜனநாயகத்தை அதன் மூலம் செழுமை படுத்துங்கள். அது உண்மையிலேயே மக்களுக்கு உழைப்பதாகும்.

//
மாறாக, மக்களை அரசியல் படுத்த ஒரு விபரீதமான முறையைக் கடைப்பிடிக்கிறார்கள், மாவோயிஸ்டுகள். தத்தம் கோரிக்கைகளுக்காக மக்கள் போராடும்போது அவற்றில் கலந்து கொண்டு, அப்போராட்டங்களையே போலீசுடனான மோதலாக மாற்றினால், நிராயுதபாணிகளான மக்களோ போலீசின் அடக்குமுறையை எதிர்கொண்டு செய்வதறியாமல் திகைத்து நிற்பார்கள்; இப்படியாக "அரசு என்பது அடக்குமுறைக் கருவி' என்ற உண்மையை மக்களுக்கு அனுபவபூர்வமாக புரிய வைத்து விடலாம் என்று நம்புகிறார்கள். இப்படியான செயல்கள் மூலம் அவர்கள் மத்தியிலிருந்து முன்னணியாளர்கள் சிலரைத் தமது "ஆயுதக் குழுக்களுக்கு' வென்றெடுக்கிறார்கள். இதுதான் மக்களைப் புரட்சிக்கு அணிதிரட்ட மாவோயிஸ்டுகள் வகுத்திருக்கும் வழிமுறை.
//

இது தவறு என்று சொல்வதற்கு மனம் நிறைந்த என்னுடைய நன்றி. இது ஒரு கேவலமான உத்தி மட்டுமல்ல, இது தீவிரவாதத்தையும் வன்முறைச் சூழலையும் ஒரு மாயச்சுழல் போல உருவாக்கும் உத்தி. அனார்க்கியை உருவாக்க விழையும் பயங்கரவாதிகள் செய்யும் உத்தி. அப்பாவிப் பொதுமக்கள் போலீஸால் சுடப்பட்டு சாவதில் தங்களது அரசியல் சக்தியை வளர்த்துக்கொள்ள விரும்பும் கேடுகெட்ட அரசியல்வியாதிகள் செய்யும் உத்தி.

//
சில சிறப்பான நிலைமைகளில் ஆந்திரம் மற்றும் தண்டகாரண்யாவின் பழங்குடி மக்கள் மத்தியில் தாங்கள் பெற்றிருக்கும் ஆதரவைக் காட்டி, அதனை மக்களின் ஆயுதப் போராட்டம் என்று சித்தரிக்கிறார்கள் மாவோயிஸ்டுகள். இதையே நாடு முழுவதற்கும் விரிவாக்க வேண்டும் என்றும் கூறுகிறார்கள்.
அந்த மக்கள் ஆதரவின் தன்மை என்ன? அது அரசியல் ரீதியான ஆதரவல்ல. ""நம்முடைய கோரிக்கைகளுக்காக நக்சல்பாரிகள் உயிரைக் கொடுக்கிறார்கள்'' என்ற அறவுணர்வின் அடிப்படையில் பழங்குடி மக்கள் வழங்கும் ஆதரவு. இத்தகைய ஆதரவு மக்களிடம் அரசியல் உணர்வை வளர்ப்பதில்லை. மாறாக, அதனை இல்லாமல் செய்து, மக்களை வெறும் பார்வையாளர்களாக்கி விடுகிறது.
//

பழங்குடிமக்கள் உதவி பெறவேண்டிய சூழ்நிலையில் இருக்கிறார்கள். அவர்களுக்கு அரசாங்க உதவியும் அவர்களது நிலப்பாதுகாப்பும் தேவை என்பதை நானும் மறுக்கவில்லை. இது சேவை நிலையங்கள் கல்வி அமைப்புகள் மூலம் அந்த பழங்குடியினர் மத்தியில் அவர்களது கலாச்சாரம் மொழி ஆகியவற்றுக்கு பங்கம் நேராதவாறு அவர்கள் மத்தியில் கல்வியை அதிகரித்து, அதன் மூலம் அவர்களுக்கு தங்களுக்கு இந்திய நாட்டில் என்ன என்ன உரிமைகள் இருக்கின்றன என்று தெளிய வைப்பதன் மூலமே அவர்களது பிரதிநிதிகளும் அவர்களது குரலுக்கு செவி சாய்ப்பார்கள். அந்த வேலையை நீங்கள் செய்யலாமே? ஆயுதப் புரட்சி என்பது நூறாண்டு முயற்சி, அதைச் செய்யத் தயாராக இருக்கும் நீங்கள், ஒரு பத்தாண்டு முயற்சியில் இந்த ஆதிவாசிகளை எல்லாம் மேலேற்ற முடியும்.

//
சமீபத்தில் சிறப்புப் பொருளாதார மண்டலங்களுக்கு எதிராக மாவோயிஸ்டுகள் அறிவித்த "பந்த்'இல் ஆந்திரத்தில் எவ்வித சம்பவமும் இல்லை என்கின்றன பத்திரிகைச் செய்திகள். சட்டிஸ்காரிலோ தொலைபேசி கோபுரம் தகர்ப்பு, மின் கோபுரம் தகர்ப்பு என்பன போன்ற சில இராணுவ நடவடிக்கைகள்தான் நடந்துள்ளன. மக்களின் அரசியல் உணர்வை அமைப்பாக்கிக் காட்டுகின்ற போராட்ட வடிவமான "பந்த்' என்ற நடவடிக்கை, செயலூக்கமிக்க பங்கேற்பின் மூலம் அவர்களுடைய வர்க்க உணர்வை இன்னும் மேம்பட்ட தளத்துக்கு உயர்த்தவேண்டிய ஒரு அரசியல் நடவடிக்கை, அதன் பொருளை இழந்து ஆளும் வர்க்கத்துக்கு "தொந்திரவு தரும் நடவடிக்கையாக'ச் சுருங்கிவிட்டதை நாம் காண்கிறோம்.
ஆந்திரத்தில் தங்கள் அமைப்பிற்குப் பின்னடைவு ஏற்பட்டிருப்பதாக ஒப்புக் கொள்கிறார் மாவோயிஸ்டு கட்சியின் மத்தியக் குழு உறுப்பினர், தோழர் சோனு. (பீப்பிள்ஸ் மார்ச், ஜூலை, 2007) ஆனால், இந்தப் பின்னடைவு குறித்தும்கூட அவர்கள் இராணுவ ரீதியாகப் பரிசீலிக்கிறார்களேயன்றி, அரசியல்ரீதியாகப் பரிசீலிப்பதில்லை.
""அங்கே மாவோயிஸ்டுகள் ஏற்கெனவே நிலைநாட்டியிருப்பதாகக் கூறிக் கொள்ளும் "மக்கள் அதிகாரத்தைப்' பாதுகாத்துக் கொள்ள மக்கள் போராடுகிறார்களா? ராஜசேகர் ரெட்டி அரசுடன் பேச்சுவார்த்தை நடந்தபோது இலட்சக்கணக்கில் திரண்ட மக்கள், பேச்சு வார்த்தையின்போதே போலி மோதல் கொலைகளை அரசு தொடங்கியபோது, அதனை எதிர்த்து அவ்வாறு மக்கள் அணிதிரளாதது ஏன்? மாவோயிஸ்டுகளின் செல்வாக்கு மிகுந்த ஆந்திரத்துக்கு, கடுமையான மக்கள் எதிர்ப்புகள் இன்றி புஷ் விஜயம் செய்ய முடிவது எப்படி? சிறப்புப் பொருளாதார மண்டலங்களில் ஆந்திரம் முன்னிலை வகிப்பதும், நாயுடுவைக் காட்டிலும் தீவிரமாகப் புதிய தாராளவாதக் கொள்கைகளை ரெட்டி அமல்படுத்த முடிவதும், இவற்றுக்கெல்லாம் எதிராக நந்திக்கிராமுடன் ஒப்பிடத்தக்க வகையிலான மக்கள் போராட்டங்கள் எதுவும் ஆந்திரத்தில் நடைபெறாமல் இருப்பதும் ஏன்?'' என்பன போன்ற கேள்விகளை அவர்கள் பரிசீலனைக்கே எடுத்துக் கொள்வதில்லை.
//

நந்திக்கிராமத்தில் அனாதரவான ஏழைகளிடமிருந்து அரசு நிலங்களை அனியாய விலையில் கைக்கொண்டு டாடாவுக்கு தாரை வார்ப்பதை எதிர்த்து மம்தா பானர்ஜியிலிருந்து பாஜக வரை எல்லோருமே எதிர்க்கிறார்கள். குஜராத்தில் இதே போலப் பல தொழிற்சாலைகளுக்கு நிலங்கள் கொடுக்கப்பட்டுள்ளன. பொதுமக்களுக்கும் அவர்களது நலனுக்கு எந்த பங்கமும் வராத அளவுக்கு அவை நடந்தேறியுள்ளன. இதனை ஏன் ஏழைகளின் பிரதிநிதியாக காட்டிக்கொள்ளும் கம்யூனிஸ்டுகள் நந்திக்கிராமத்தில் அராஜகமான முறையில் செய்தார்கள்? ஏன் இந்தியாவில் எந்த மாநிலத்திலும் இல்லாத அளவுக்கு ரேஷன் அரிசிக்காக ஏழைகள் மேற்குவங்காளத்தில் கலவரத்தில் இறங்கினார்கள்?
இந்த கேள்விக்குப் பதிலாக நீங்கள் அவர்களை போலி கம்யூனிஸ்டுகள் என்று கூறலாம். ஆனால், உங்களையும் போலி கம்யூனிஸ்டு என்று இன்னொரு "தூய கம்யூனிஸ்டு" கூட்டம் இப்போதும் சொல்லிக்கொண்டுதான் இருக்கிறது.
ஏன் சிபிஎம் அப்படி மக்களை துச்சமாக மதித்தார்கள், மதிக்கிறார்கள் என்பதற்குப் பதில் இந்த கட்டுரையிலேயே உங்களது "எல்லாம் தெரிந்த " தொனியில் இருக்கிறது. தங்களிடம் மட்டும்தான் உண்மையான ‘விஞ்ஞான’பூர்வமான கம்யூனிஸம் இருக்கிறது. அதனால், மக்களுக்கு என்ன தேவை என்பது தங்களுக்கு மட்டுமே தெரியும் என்ற அராஜக எண்ணத்தில் இருக்கிறது. சற்றே சிந்தித்துப்பாருங்கள். ஃபார்முலாவை உச்சாடனம் செய்வது எளிது. உருப்படியாகத் தானாகச் சிந்திப்பது கடினம். கடின வேலையைச் செய்யுங்கள்.

//
""அடக்குமுறை இருப்பதால் மக்கள் திரளவில்லை, இல்லையென்றால் மக்கள் திரளுவார்கள்'' என்ற எளிய சூத்திரத்தைச் சொல்லி ஆறுதல் அடைந்து கொள்கின்றனர். வரலாறு நெடுகிலும் நடந்திருக்கின்ற மக்களின் அரசியல் ரீதியான எழுச்சிகளோ, நம் கண் முன்னே காஷ்மீரிலும், மணிப்பூரிலும் ஏன், நந்திக்கிராமிலும் அடக்குமுறைகளை மீறிக் கிளர்ந்தெழும் மக்கள் எழுச்சிகளோ கூட (அவை வேறு யார் தலைமையிலானவையாக இருந்தாலும்) மாவோயிஸ்டுகளுடைய கண்களைத் திறக்கவில்லை. ஏனெனில், அவர்களுடைய சுத்த இராணுவக் கண்ணோட்டம், மக்களின் அரசியல் முன்முயற்சி பற்றிக் கவலைப்படுவதில்லை. "தமது ஆயுத நடவடிக்கைகளுக்கு உதவுவது' என்ற கோணத்தில் மட்டுமே மக்களின் ஆதரவு குறித்துக் கவலைப்படுகிறார்கள்.
//

"அடக்குமுறை இருப்பதால் மக்கள் திரளவில்லை, இல்லையென்றால் மக்கள் திரளுவார்கள்'' இது சூத்திரமா? கம்யூனிஸ்டுகள் எதையும் தலைகீழாகத்தான் புரிந்துக்கொள்வார்களோ?
அடக்குமுறை அதிகமாக அதிகமாக மக்கள் அடக்குமுறைக்கு எதிராக திரளுவார்கள். அடக்குமுறை இல்லையேல், எதனை எதிர்த்து மக்கள் திரளுவார்கள்?

அடுத்து, மக்கள் எழுச்சி என்றால் என்ன? நீங்கள் சொல்வதையெல்லாம் மக்கள் எழுச்சி என்றால், ஐம்பது பேர் கூட்டம் சேர்த்துக்கொண்டு நான்கு பேரை கொலை செய்தால் அது மக்கள் எழுச்சியா? பாகிஸ்தானிலிருந்து காஷ்மீருக்குள்ளே வந்து, அங்கிருக்கும் பர்தா அணியாத பெண்கள் மீது ஆசிட் ஊற்றுவது மக்கள் எழுச்சியா? அப்படியானால், மு க அழகிரி கூட்டம் சேர்த்து தினகரன் அலுவலகத்தில் இருந்த மூன்று கம்ப்யூட்டர் என்ஜினியர்களை கொலை செய்தது, கிளர்ந்தெழும் மக்கள் எழுச்சியா? மக்கள் எழுச்சிக்கு என்ன இலக்கணம் வைத்திருக்கிறீர்கள்? டியனன்மேன் சதுக்கத்தில் மாணவர்கள் போராடியது மக்கள் எழுச்சியா? இல்லையென்றால் ஏன்? எப்படி?

//
""மாவோயிஸ்டுகளின் கொள்கைகளை மறைத்து விட்டு அவர்களை வெறும் ஆயுத மோகம் கொண்ட தீவிரவாதிகளாகக் காட்ட ஊடகங்கள் முயல்கின்றன'' என்று மாவோயிஸ்டு தமிழ் மாநிலக் குழு வெளியிட்டுள்ள அறிக்கை கூறுகிறது. ஊடகங்கள் அவதூறு செய்வது இருக்கட்டும், உண்மை நிலவரமென்ன? "" ஆயுதப் போராட்டத்தில் ஈடுபட்டிருக்கிறார்களா என்பதுதான் ஒரு அமைப்பை புரட்சிகர அமைப்பு என்று மதிப்பிடுவதற்கான முன் நிபந்தனை'' என்று மாவோயிஸ்டு அமைப்பினர் கொண்டிருக்கும் கருத்துக்கும், சிறுபிள்ளைத்தனமான பெரியகுளம் ஆயுதப்போராட்டத் தயாரிப்புக்கும் வேறென்ன பொருள்? "புரட்சிகர அரசியலின் பௌதிக வடிவமே துப்பாக்கிதான்' என்று கருதும் சிந்தனைதானே இதில் வெளிப்படுகிறது!
//

புரட்சிகர அரசியலின் பௌதிக வடிவமே துப்பாக்கிதான் என்றுதானே நீங்கள் தினந்தோறும் தெண்டனிட்டு வணங்கும் மார்க்ஸ், எங்கெல்ஸ், லெனின் மாவோ ஆகியோரும் கூறியிருக்கிறார்கள்? அவர்கள் மார்க்ஸிய, எங்கலிஸ, லெனினிய மாவோயிஸ அறிவியற்பூர்வமான விஞ்ஞானப்பூர்வமான புரட்சி பாதையில்தானே செல்கிறார்கள்?சரி விஞ்ஞானப்பூர்வம் என்ற தலைப்பில் அவ்வப்போது கொள்கையை மாற்றிக்கொள்ளலாம் என்றால், எது திரித்தல்வாதம், எது விஞ்ஞானப்பூர்வமான முன்னெடுப்பு என்பதனை வித்தியாசப்படுத்தி காட்ட ஏதேனும் டெஸ்ட் ட்யூப், பரிசோதனைகள் வைத்திருக்கிறீர்களா?

//
""அரசியல் போராட்டத்தின் முதிர்ந்த வடிவம்தான் ஆயுதப்போராட்டம் என்பதையும், அரசியல் போராட்ட அனுபவத்தினூடாக ஆயுதப் போராட்டத்தின் அவசியத்தை மக்கள் உணரச் செய்ய வேண்டும்'' என்று நாம் கூறுவதையும் மாவோயிஸ்டு அமைப்பினர் ஏளனத்துடன் மறுக்கிறார்கள். ""மக்கள் ஆயுதப்போராட்டத்துக்குத் தயாராகத்தான் இருக்கிறார்கள். சும்மா எத்தனை நாள் பேசிக்கொண்டே இருக்க முடியும்? நாம்தான் ஆயுதப் போராட்டத்தைத் தொடங்க வேண்டும்'' என்று அரசியலையே வீர வசனமாகச் சுருக்குகிறார்கள்.
மக்களைப் புரட்சிக்கு அணியமாக்குவதும், தலைமை தாங்குவதும்தான் கம்யூனிஸ்டுகளுக்குரிய பணியே அன்றி, மக்களின் சார்பாகப் புரட்சி செய்வதல்ல. புரட்சி என்பது ஆளும் வர்க்கங்களுடன் புரட்சியாளர்கள் "ஒண்டிக்கு ஒண்டி' நடத்தும் சண்டையும் அல்ல. ஆனால், மக்களுக்கு விடுதலையை "வழங்கப் பொறுப்பேற்றிருக்கும்' இடது சாகசவாதம் இப்படித்தான் கருதிக் கொள்கிறது.
//

ஆக முன்னரே சொன்னதுபோல கொலைகளுக்கு மக்களை தயார்படுத்திவிட்டுத்தான் கொலை செய்யவேண்டும் என்று நீங்கள் சொல்கிறீர்கள். இடதுசாரி சாகசவாதிகள் என்று நீங்கள் கூறும் அவர்களோ இன்றே கொலை செய்யலாம் என்று சொல்கிறார்கள். எப்போது கொலை செய்யலாம் என்பதுதான் உங்களிடையே இருக்கும் வித்தியாசம், இல்லையா?

//
வலது சந்தர்ப்பவாதிகளான போலி கம்யூனிஸ்டுகள் புரட்சிக்கு இழைக்கும் துரோகம் எளிதில் அம்பலமாகிவிடுகிறது. ஆனால், இடது சாகசவாதமும் புரட்சிக்கு இழப்பைத்தான் ஏற்படுத்துகிறது என்பதைப் பலர் புரிந்து கொள்வதில்லை. சிறையையும் சித்திரவதையையும் சந்திக்கும் அந்தத் தோழர்களின் தனிப்பட்ட இழப்பாக மட்டுமே இது புரிந்து கொள்ளப்படுகிறது.
""பயங்கரவாதப் படையான அதிரடிப்படையை அனுப்புவதன் மூலம் மாவோயிஸ்டு புரட்சியாளர்களை மட்டுமல்ல, இச்சமூக அமைப்பை எதிர்த்துப் போராடும் அனைவரையும் மிரட்ட முயற்சிக்கிறார் கருணாநிதி'' என்று தமது அறிக்கையில் குறிப்பிட்டிருக்கிறது, மாவோயிஸ்டு கட்சியின் தமிழ் மாநிலக் குழு.
உண்மைதான். ஆளும் வர்க்கத்தின் அடியாட்படையான அரசு எந்திரமும் அதிரடிப்படையும் மக்கள் அனைவரின் பொது எதிரி என்பதில் எவ்வித ஐயமும் இல்லை. ஆனால், அந்த எதிரிப்படை தன்னை நாயகனாகச் சித்தரித்துக்கொள்ளவும், தன்னுடைய பயங்கரவாத நடவடிக்கைகளை நியாயப்படுத்திக் கொள்ளவும், புரட்சியாளர்களை மக்களிடமிருந்து தனிமைப்படுத்தவும் மாவோயிஸ்டுகளின் இந்த நடவடிக்கை எதிரிக்கு வாய்ப்பை ஏற்படுத்திக் கொடுத்திருக்கிறது. இது புரட்சிக்கு ஏற்படும் இழப்பு என்பதை இனிமேலாவது அவர்கள் புரிந்து கொள்ளப் போகிறார்களா என்பதுதான் கேள்வி.
— ஆசிரியர் குழு
//

"நடவ்டிக்கை எடுக்க" வாய்ப்பை ஏற்படுத்திக் கொடுக்கிறது என்பது தான், சாகசக் காரர்களின் மீது இவர்கள் குற்றச்சாட்டு. மக்களைக் கொலைசெய்த படுபாவிகள் வெறும் சாகசக்காரர்களாய் ஆகிவிட்டார்கள். கொலை செய்யப்பட்ட மக்கள் மீது துளியும் அனுதாபமோ, மனிதாபிமானமோ இல்லாமல், புரட்சி ஏற்படுத்த இந்த மடமக்கள் தடையாய் இருக்கிறார்கள் , இந்த அரசு எப்படி ஆளும்வர்க்க,நவகாலனிய, தரகு முதலாளித்துவ புண்ணாக்கு என்று புரிந்து கொள்ளாமல் இருக்கிறார்களே என்று மக்கள் மீது பாவம் இவர்களுக்குக் கோபம். மக்களை மாக்களாய் எண்ணுபவர்கள் இவர்கள் தானே தவிர தம் கொள்கைகளை மக்களுக்கு விளக்கிப் பேசி ஜனநாயகத்தில் பங்கெடுக்கச் செய்து அவர்களின் ஆதரவில் ஆட்சிக்கு வரும் அரசியல்வாதிகள் அல்ல. இந்த கொலைவெறியர்களும் ஒப்பிடுகையில் கலைஞரும், ஜெயலலிதாவும், கோவில் கட்டிக் கும்பிட வேண்டியவர்கள். மக்களை மதிப்பவர்கள்.
அதிரடிப் படையை அனுப்பி மக்களைக் காப்பாற்ற வேண்டிய பொறுப்பு அரசிற்கு இருக்கிறது. இந்த புரட்சிவசனகர்த்தாக்களின் ஆயுதக் கிடங்கிலிருந்தும், கொலைவெறியிலிருந்தும் மக்களைக் காப்பாற்றி , உண்மையான ஜனநாயகத்திற்கு அரணாக இருக்குமாறு அதிரடிப் படையை அனுப்பிய கலைஞரை மனதாரப் பாராட்டுவோம்.
துப்பாக்கி முனையில் அரசியல் அதிகாரம் பிறகிறது என்று திருவாய் மலர்ந்தருளிய வன்முறை ஜார் மாஓவின் வழி வந்தவர்கள் இந்த புரட்சிக்காரர்கள். ஓட்டுப் போட்டு மக்கள் தேர்ந்தெடுப்பவர்கள் எல்லாம், ஆளும் வர்க்கத்தின் கைப்பாவையாம். ஓட்டெல்லாம் தேவையில்லை, வெடிக்காய் வியாபாரம் பண்ணி புரட்சியை விலைக்கு வாங்குவதற்காக, அப்பாவி மக்களை பலியிடும் இவர்கள் புரட்சிக் காரர்களாம்.
ஆளும் வர்க்கம் என்று ஒன்றும் இல்லை. பாரதிய ஜனதா கட்சியும், காங்கிரசும், மாயாவதியும், லல்லுபிரசாத் யாதவும், நாளைக்கு பிகாரில் ஆட்சிக்கு வரக்கூடிய சிபிஎம்-எலும் ஆளும் வர்க்கம் இல்லை. இவர்கள் தேர்தலில் நிற்கிறார்கள். மக்கள் ஓட்டுப்போட்டால் ஜெயிக்கிறார்கள். மக்கள் ஓட்டுப்போடவில்லை என்றால், தோற்கிறார்கள். மக்கள் பிரச்னைகளை மேற்கொண்டு மக்களிடம் சென்றால் அவர்கள் ஓட்டுப்போடுவார்கள். இல்லையேல் போய் வா என்று அனுப்புவார்கள்.

புரட்சி என்ற பெயரில் கொலைகளும், ஆள்மறைவும், உழைப்ப்பு முகாம்கள் என்ற பெயரில் திறந்த வெளிச்சிறைச்சாலைகளும், மாற்றுக் கருத்துகளை முடக்கி, மாற்றுக் கருத்துக் கொண்டவர்களை கொன்று நாட்டைப் பிணக்காடாக்கிய ஸ்டாலின், மாஓவின் வாரிசுகள் என்று தமிழ்நாட்டில் வேர் ஊன்றலாகாது என்று ஒவ்வொரு தமிழரும் சபதம் மேற்கொள்வோ. நாமார்க்கும் குடியல்லோம் என்று உரைத்த கவிஞன் அடிமைத்தனத்துக்கு எதிராய் உரைத்த கவிஞன் வாழ்ந்த நாடு தமிழ் நாடு, எப்பொருள் யார்யார் வாய்க் கேட்பினும் மெய்ப்பொருள் காண்பது அறிவு என அறிவுக்கு முக்கியத்துவம் கொடுத்த மரபு தமிழ் மரபு. அறிவுக்கும், உணர்விற்கும், மனிதாபிமானத்துக்கும், ஜனநாயகத்திற்கும் எதிரான மாஒயிச, ஸ்டாலினிச கொடுங்கோன்மை கருத்துகளுக்கு இங்கே இடம் இல்லை

வாழ்க ஓட்டுப்பொறுக்கி அரசியல்!